jab KHud mein kuchh mila na KHad-o-Khaal ki tarah

jab ḳhud meñ kuchh milā na ḳhad-o-ḳhāl kī tarah

kuchh aa.ine meñ DhūñDh liyā baal kī tarah

soī huī hai sub.h kī talvār jab talak

ye shab hai jugnuoñ ke liye Dhaal kī tarah

kuchh raushnī ke daaġh ujāle kā ek zaḳhm

kuchh to hai shab ke dil meñ zar-o-māl kī tarah

tahrīr kar rahī hai mirī past tishnagī

jhīloñ ko pāniyoñ ke bichhe jaal kī tarah

nāgin hai koī bel shajar bā-ḳhabar nahīñ

keñchul chaḌhī ho tan pe agar chhāl kī tarah

phir bhī tamām daaġh chhupā.e na chhup sake

go chāñdnī badan pe rahī shaal kī tarah

bas aa.ine se ek mulāqāt ke sabab

lamhāt ho ga.e haiñ mah-o-sāl kī tarah

tum jhuk ga.e 'mayañk' zamāne ke sāmne

phūloñ se aur phaloñ se ladī Daal kī tarah

jab KHud mein kuchh mila na KHad-o-KHal ki tarah

kuchh aaine mein DhunDh liya baal ki tarah

soi hui hai subh ki talwar jab talak

ye shab hai jugnuon ke liye Dhaal ki tarah

kuchh raushni ke dagh ujale ka ek zaKHm

kuchh to hai shab ke dil mein zar-o-mal ki tarah

tahrir kar rahi hai meri past tishnagi

jhilon ko paniyon ke bichhe jal ki tarah

nagin hai koi bel shajar ba-KHabar nahin

kenchul chaDhi ho tan pe agar chhaal ki tarah

phir bhi tamam dagh chhupae na chhup sake

go chandni badan pe rahi shaal ki tarah

bas aaine se ek mulaqat ke sabab

lamhat ho gae hain mah-o-sal ki tarah

tum jhuk gae 'mayank' zamane ke samne

phulon se aur phalon se ladi Dal ki tarah