jab kisi laeq nahin hum jab kisi qabil nahin

jab kisī laa.eq nahīñ ham jab kisī qābil nahīñ

maut behtar aise jiine se to kuchh hāsil nahīñ

khīñchte ho kaisī bedardī se mere dil se tiir

chārasāzo kyā tumhāre pahluoñ meñ dil nahīñ

uḌ ga.ī hai hijr meñ shāhid haiñ taare charḳh ke

yād-e-jānāñ se hamārī niiñd tak ġhāfil nahīñ

dekh kar sūrat mirī kahte haiñ mere chāra-sāz

mar nahīñ saktā to ye jiine ke bhī qābil nahīñ

kuchh samajh kar majma.a-e-mahshar meñ aa nikle the ham

ġhaur se dekhā to ye zālim tirī mahfil nahīñ

aap the 'safdar' sar-e-mahfil kisī ke shikva-sanj

aap kahte the ki siine meñ hamāre dil nahīñ

jab kisi laeq nahin hum jab kisi qabil nahin

maut behtar aise jine se to kuchh hasil nahin

khinchte ho kaisi bedardi se mere dil se tir

chaarasazo kya tumhaare pahluon mein dil nahin

uD gai hai hijr mein shahid hain tare charKH ke

yaad-e-jaanan se hamari nind tak ghafil nahin

dekh kar surat meri kahte hain mere chaara-saz

mar nahin sakta to ye jine ke bhi qabil nahin

kuchh samajh kar majma-e-mahshar mein aa nikle the hum

ghaur se dekha to ye zalim teri mahfil nahin

aap the 'safdar' sar-e-mahfil kisi ke shikwa-sanj

aap kahte the ki sine mein hamare dil nahin