jab kisi ne haal puchha ro diya

jab kisī ne haal pūchhā ro diyā

chashm-e-tar tū ne to mujh ko kho diyā

daaġh ho yā soz ho yā dard-o-ġham

le liyā ḳhush ho ke jis ne jo diyā

ashk-rezī ke dhaḌalle ne ġhubār

jab zarā bhī dil pe dekhā dho diyā

dil kī parvā tak nahīñ ai be-ḳhudī

kyā kiyā pheñkā kahāñ kis ko diyā

kuchh na kuchh is anjuman meñ hasb-e-hāl

tū ne qassam-e-azal sab ko diyā

kisht-e-duniyā kyā ḳhabar kyā phal mile

tuḳhm-e-ġham ham ne to aa kar bo diyā

ye bhī nasha mai-kasho kuchh kam nahīñ

de na de saaqī pa tum samjho diyā

'shād' ke aage bhalā kyā zikr-e-yār

naam idhar aayā ki us ne ro diyā

zumra-e-ahl-e-qalam meñ likh ke naam

ḳhud ko nāhaq 'shād' tū ne kho diyā

jab kisi ne haal puchha ro diya

chashm-e-tar tu ne to mujh ko kho diya

dagh ho ya soz ho ya dard-o-gham

le liya KHush ho ke jis ne jo diya

ashk-rezi ke dhaDalle ne ghubar

jab zara bhi dil pe dekha dho diya

dil ki parwa tak nahin ai be-KHudi

kya kiya phenka kahan kis ko diya

kuchh na kuchh is anjuman mein hasb-e-haal

tu ne qassam-e-azal sab ko diya

kisht-e-duniya kya KHabar kya phal mile

tuKHm-e-gham hum ne to aa kar bo diya

ye bhi nasha mai-kasho kuchh kam nahin

de na de saqi pa tum samjho diya

'shad' ke aage bhala kya zikr-e-yar

nam idhar aaya ki us ne ro diya

zumra-e-ahl-e-qalam mein likh ke nam

KHud ko nahaq 'shad' tu ne kho diya