jab koi kali sehn-e-gulistan mein khili hai

jab koī kalī sehn-e-gulistāñ meñ khilī hai

shabnam mirī āñkhoñ meñ vahīñ tair ga.ī hai

jis kī sar-e-aflāk baḌī dhuum machī hai

āshufta-sarī hai mirī āshufta-sarī hai

apnī to ujāloñ ko tarastī haiñ nigāheñ

sūraj kahāñ niklā hai kahāñ sub.h huī hai

bichhḌī huī rāhoñ se jo guzre haiñ kabhī ham

har gaam pe khoī huī ik yaad milī hai

ik umr sunā.eñ to hikāyat na ho puurī

do roz meñ ham par jo yahāñ biit ga.ī hai

hañsne pe na majbūr karo log hañseñge

hālāt kī tafsīr to chehre pe likhī hai

mil jaa.eñ kahīñ vo bhī to un ko bhī sunā.eñ

'jālib' ye ġhazal jin ke liye ham ne kahī hai

jab koi kali sehn-e-gulistan mein khili hai

shabnam meri aankhon mein wahin tair gai hai

jis ki sar-e-aflak baDi dhum machi hai

aashufta-sari hai meri aashufta-sari hai

apni to ujalon ko tarasti hain nigahen

suraj kahan nikla hai kahan subh hui hai

bichhDi hui rahon se jo guzre hain kabhi hum

har gam pe khoi hui ek yaad mili hai

ek umr sunaen to hikayat na ho puri

do roz mein hum par jo yahan bit gai hai

hansne pe na majbur karo log hansenge

haalat ki tafsir to chehre pe likhi hai

mil jaen kahin wo bhi to un ko bhi sunaen

'jalib' ye ghazal jin ke liye hum ne kahi hai