jab main suna ki yar ka dil mujhse haT gaya

jab maiñ sunā ki yaar kā dil mujh se haT gayā

sunte hī is ke merā kaleja ulaT gayā

farhād thā to shīrīñ ke ġham meñ muā ġharīb

lailā ke ġham meñ aan ke majnūñ bhī laT gayā

maiñ ishq kā jalā huuñ mirā kuchh nahīñ ilaaj

vo peḌ kyā harā ho jo jaḌ se ukhaT gayā

itnā koī kahe ki divāne paḌā hai kyā

jā dekh abhī udhar koī pariyoñ kā ġhaT gayā

chhīnā thā dil ko chashm ne lekin maiñ kyā karūñ

uupar hī uupar us saf-e-mizhgāñ meñ paT gayā

kyā kheltā hai naT kī kalā āñkhoñ āñkhoñ meñ

dil saaf le liyā hai jo pūchhā to naT gayā

āñkhoñ meñ merī sub.h-e-qayāmat ga.ī jhamak

siine se us parī ke jo parda ulaT gayā

sun kar lagī ye kahne vo ayyār-e-nāznīñ

''kyā boleñ chal hamārā to dil tujh se phaT gayā''

jab maiñ ne us sanam se kahā kyā sabab hai jaan

iḳhlās ham se kam huā aur pyaar ghaT gayā

aisī vo bhārī mujh se huī kaun sī ḳhatā

jis se ye dil udaas huā jī uchaT gayā

āñkheñ tumhārī kyā phirīñ us vaqt merī jaan

sach pūchhiye to mujh se zamāna ulaT gayā

ushshāq jāñ-nisāroñ meñ maiñ to imaam huuñ

ye kah ke maiñ jo us ke gale se lipaT gayā

kitnā hī us ne tan ko chhuḌāyā jhiḌak jhiḌak

par maiñ bhī qaiñchī bāñdh ke aisā chimaT gayā

ye kashmakash huī ki garebāñ mirā udhar

TukḌe huā aur us kā dupaTTa bhī phaT gayā

āḳhir isī bahāne milā yaar se 'nazīr'

kapḌe balā se phaT ga.e saudā to paT gayā

jab main suna ki yar ka dil mujh se haT gaya

sunte hi is ke mera kaleja ulaT gaya

farhad tha to shirin ke gham mein mua gharib

laila ke gham mein aan ke majnun bhi laT gaya

main ishq ka jala hun mera kuchh nahin ilaj

wo peD kya hara ho jo jaD se ukhaT gaya

itna koi kahe ki diwane paDa hai kya

ja dekh abhi udhar koi pariyon ka ghaT gaya

chhina tha dil ko chashm ne lekin main kya karun

upar hi upar us saf-e-mizhgan mein paT gaya

kya khelta hai naT ki kala aankhon aankhon mein

dil saf le liya hai jo puchha to naT gaya

aankhon mein meri subh-e-qayamat gai jhamak

sine se us pari ke jo parda ulaT gaya

sun kar lagi ye kahne wo ayyar-e-naznin

kya bolen chal hamara to dil tujh se phaT gaya

jab main ne us sanam se kaha kya sabab hai jaan

iKHlas hum se kam hua aur pyar ghaT gaya

aisi wo bhaari mujh se hui kaun si KHata

jis se ye dil udas hua ji uchaT gaya

aankhen tumhaari kya phirin us waqt meri jaan

sach puchhiye to mujh se zamana ulaT gaya

ushshaq jaan-nisaron mein main to imam hun

ye kah ke main jo us ke gale se lipaT gaya

kitna hi us ne tan ko chhuDaya jhiDak jhiDak

par main bhi qainchi bandh ke aisa chimaT gaya

ye kashmakash hui ki gareban mera udhar

TukDe hua aur us ka dupaTTa bhi phaT gaya

aaKHir isi bahane mila yar se 'nazir'

kapDe bala se phaT gae sauda to paT gaya