jab nam tera lijiye tab chashm bhar aawe

jab naam tirā lījiye tab chashm bhar aave

is zindagī karne ko kahāñ se jigar aave

talvār kā bhī maarā ḳhudā rakkhe hai zālim

ye to ho koī gor-e-ġharībāñ meñ dar aave

mai-ḳhāna vo manzar hai ki har sub.h jahāñ shaiḳh

dīvār pe ḳhurshīd kā mastī se sar aave

kyā jāneñ ve murġhān-e-giraftār-e-chaman ko

jin tak ki ba-sad-nāz nasīm-e-sahar aave

tū sub.h qadam-ranja kare Tuk to hai varna

kis vāste āshiq kī shab-e-ġham basar aave

har sū sar-e-taslīm rakhe said-e-haram haiñ

vo said-fagan teġh-ba-kaf tā kidhar aave

dīvāroñ se sar mārte phirne kā gayā vaqt

ab tū hī magar aap kabhū dar se dar aave

vaa.iz nahīñ kaifiyyat-e-mai-ḳhāna se āgāh

yak jur.a badal varna ye mindīl dhar aave

sannā.a haiñ sab ḳhvār azaañ jumla huuñ maiñ bhī

hai aib baḌā us meñ jise kuchh hunar aave

ai vo ki tū baiThā hai sar-e-rāh pe zinhār

kahiyo jo kabhū 'mīr' balā-kash idhar aave

mat dasht-e-mohabbat meñ qadam rakh ki ḳhizar ko

har gaam pe is rah meñ safar se hazar aave

jab nam tera lijiye tab chashm bhar aawe

is zindagi karne ko kahan se jigar aawe

talwar ka bhi mara KHuda rakkhe hai zalim

ye to ho koi gor-e-ghariban mein dar aawe

mai-KHana wo manzar hai ki har subh jahan shaiKH

diwar pe KHurshid ka masti se sar aawe

kya jaanen we murghan-e-giraftar-e-chaman ko

jin tak ki ba-sad-naz nasim-e-sahar aawe

tu subh qadam-ranja kare Tuk to hai warna

kis waste aashiq ki shab-e-gham basar aawe

har su sar-e-taslim rakhe said-e-haram hain

wo said-fagan tegh-ba-kaf ta kidhar aawe

diwaron se sar marte phirne ka gaya waqt

ab tu hi magar aap kabhu dar se dar aawe

waiz nahin kaifiyyat-e-mai-KHana se aagah

yak jura badal warna ye mindil dhar aawe

sannaa hain sab KHwar azan jumla hun main bhi

hai aib baDa us mein jise kuchh hunar aawe

ai wo ki tu baiTha hai sar-e-rah pe zinhaar

kahiyo jo kabhu 'mir' bala-kash idhar aawe

mat dasht-e-mohabbat mein qadam rakh ki KHizar ko

har gam pe is rah mein safar se hazar aawe