jab pattharon ke shahr mein humne azan di

jab pattharoñ ke shahr meñ ham ne azaan dī

us roz mūratoñ ko ḳhudā ne zabān dī

phir kyā bachegā terī masīhā.ī kā bharam

jab tere dar pe maiñ ne kisī roz jaan dī

mujh ko mile vo tiir shikasta the jin ke phal

phir us pe mustazād ki TuuTī kamān dī

mish’al-ba-kaf maiñ saltanat-e-shab meñ kyā gayā

merī duhā.ī raat ne saat āsmān dī

le aaj mere ḳhirqa-e-sad-chāk kā ḳhirāj

jā ai amīr-e-shahr ki jaañ tujh ko daan dī

mujh ko 'atā hue the nishāñ sharq-o-ġharb ke

phir us ke baa'd ek lahad be-nishān dī

tujh ko tilism-e-hosh-rubā sā milā thā ruup

mujh ko bhī us ne ek alag dāstān dī

maiñ terā naam le ke chalā daar kī taraf

yuuñ tū ne mujh ko daulat-e-har-do-jahān dī

maiñ dekhtā rahā thā bahut der ik ġhazal

phir dil ne mujh ko ek ġhazal tarjumān dī

'hammād' shahr-e-zulm kī har riit hai 'ajab

jo fasl jal chukī thī usī kī lagān dī

jab pattharon ke shahr mein hum ne azan di

us roz muraton ko KHuda ne zaban di

phir kya bachega teri masihai ka bharam

jab tere dar pe main ne kisi roz jaan di

mujh ko mile wo tir shikasta the jin ke phal

phir us pe mustazad ki TuTi kaman di

mish’al-ba-kaf main saltanat-e-shab mein kya gaya

meri duhai raat ne sat aasman di

le aaj mere KHirqa-e-sad-chaak ka KHiraj

ja ai amir-e-shahr ki jaan tujh ko dan di

mujh ko 'ata hue the nishan sharq-o-gharb ke

phir us ke ba'd ek lahad be-nishan di

tujh ko tilism-e-hosh-ruba sa mila tha rup

mujh ko bhi us ne ek alag dastan di

main tera nam le ke chala dar ki taraf

yun tu ne mujh ko daulat-e-har-do-jahan di

main dekhta raha tha bahut der ek ghazal

phir dil ne mujh ko ek ghazal tarjuman di

'hammad' shahr-e-zulm ki har rit hai 'ajab

jo fasl jal chuki thi usi ki lagan di