jab qafas mein mujhko yaad-e-ashiyan aa jae hai

jab qafas meñ mujh ko yād-e-āshiyāñ aa jaa.e hai

sāmne āñkhoñ ke ik bijlī sī lahrā jaa.e hai

dil mirā vo ḳhāna-e-vīrāñ hai jal bujhne pe bhī

raakh se jis kī dhuāñ tā-der uThtā jaa.e hai

tum to Thukrā kar guzar jaao tumheñ Tokegā kaun

maiñ paḌā huuñ raah meñ to kyā tumhārā jaa.e hai

chashm-e-tar hai is taraf aur us tarf abr-e-bahār

dekhnā hai aaj kis se kitnā royā jaa.e hai

maiñ to bas ye jāntā huuñ is ko honā hai ḳharāb

kyā ḳhabar us kī mujhe dil aa.e hai yā jaa.e hai

merā pindār-e-ḳhudā.ī us ghaḌī dekhe koī

jab mujhe banda tirā kah kar pukārā jaa.e hai

ab vo kyā ā.eñge tum bhī aañkh jhapkā lo 'niyāz'

sub.h kā taara bhī ab to jhilmilātā jaa.e hai

jab qafas mein mujh ko yaad-e-ashiyan aa jae hai

samne aankhon ke ek bijli si lahra jae hai

dil mera wo KHana-e-viran hai jal bujhne pe bhi

rakh se jis ki dhuan ta-der uThta jae hai

tum to Thukra kar guzar jao tumhein Tokega kaun

main paDa hun rah mein to kya tumhaara jae hai

chashm-e-tar hai is taraf aur us tarf abr-e-bahaar

dekhna hai aaj kis se kitna roya jae hai

main to bas ye jaanta hun is ko hona hai KHarab

kya KHabar us ki mujhe dil aae hai ya jae hai

mera pindar-e-KHudai us ghaDi dekhe koi

jab mujhe banda tera kah kar pukara jae hai

ab wo kya aaenge tum bhi aankh jhapka lo 'niyaz'

subh ka tara bhi ab to jhilmilata jae hai