jab samaat teri aawaz talak jati hai

jab samā'at tirī āvāz talak jaatī hai

jaane kyuuñ paañv kī zanjīr chhanak jaatī hai

phir usī ġhaar ke asrār mujhe khīñchte haiñ

jis taraf shaam kī sunsān saḌak jaatī hai

jaane kis qarya-e-imkāñ se vo lafz aatā hai

jis kī ḳhushbū se har ik satr mahak jaatī hai

mū-qalam ḳhuuñ meñ Dubotā hai musavvir shāyad

aañkh kī putlī se tasvīr chipak jaatī hai

dāstānoñ ke zamānoñ kī ḳhabar miltī hai

aa.ine meñ vo parī jab bhī jhalak jaatī hai

ḳhushk pattoñ meñ kisī yaad kā sho'la hai 'sa.īd'

maiñ bujhātā huuñ magar aag bhaḌak jaatī hai

jab sama'at teri aawaz talak jati hai

jaane kyun panw ki zanjir chhanak jati hai

phir usi ghaar ke asrar mujhe khinchte hain

jis taraf sham ki sunsan saDak jati hai

jaane kis qarya-e-imkan se wo lafz aata hai

jis ki KHushbu se har ek satr mahak jati hai

mu-qalam KHun mein Dubota hai musawwir shayad

aankh ki putli se taswir chipak jati hai

dastanon ke zamanon ki KHabar milti hai

aaine mein wo pari jab bhi jhalak jati hai

KHushk patton mein kisi yaad ka sho'la hai 'said'

main bujhata hun magar aag bhaDak jati hai