jab sar-e-baam wo KHurshid-jamal aata hai

jab sar-e-bām vo ḳhurshīd-jamāl aatā hai

zarre zarre pe qayāmat kā jalāl aatā hai

phuul muskāte haiñ lahrātī hai Tahnī Tahnī

fasl-e-gul aate hī har shai pe jamāl aatā hai

vo janam-din pe bulāte haiñ hamesha mujh ko

har nayā saal ba-andāz-e-visāl aatā hai

kyuuñ tire hoñT mujhe dete haiñ manfī meñ javāb

mere hoñToñ pe ye rah rah ke savāl aatā hai

jab savālī koī aa jaatā hai dar par to mujhe

us kī baḳhshī huī ne.amat kā ḳhayāl aatā hai

un ke khilte hue joban ko vo murjhā na sakā

aane ko daur-e-ḳhizāñ sāl-ba-sāl aatā hai

mujhe jachtī hī nahīñ aur kisī kī sūrat

jab ḳhayāl aatā hai terā hī ḳhayāl aatā hai

taare ginvātī haiñ phir hijr kī kaalī rāteñ

jab mujhe yaad koī zohra-jamāl aatā hai

yuuñ ruḳh-e-zard chamak uThtā hai aane pe tire

jaise holī meñ koī mal ke gulāl aatā hai

apne hāthoñ ke pale log jo ho jaa.eñ ḳhilāf

un ke aḳhlāq pe ai 'charḳh' malāl aatā hai

jab sar-e-baam wo KHurshid-jamal aata hai

zarre zarre pe qayamat ka jalal aata hai

phul muskate hain lahraati hai Tahni Tahni

fasl-e-gul aate hi har shai pe jamal aata hai

wo janam-din pe bulate hain hamesha mujh ko

har naya sal ba-andaz-e-visal aata hai

kyun tere honT mujhe dete hain manfi mein jawab

mere honTon pe ye rah rah ke sawal aata hai

jab sawali koi aa jata hai dar par to mujhe

us ki baKHshi hui neamat ka KHayal aata hai

un ke khilte hue joban ko wo murjha na saka

aane ko daur-e-KHizan sal-ba-sal aata hai

mujhe jachti hi nahin aur kisi ki surat

jab KHayal aata hai tera hi KHayal aata hai

tare ginwati hain phir hijr ki kali raaten

jab mujhe yaad koi zohra-jamal aata hai

yun ruKH-e-zard chamak uThta hai aane pe tere

jaise holi mein koi mal ke gulal aata hai

apne hathon ke pale log jo ho jaen KHilaf

un ke aKHlaq pe ai 'charKH' malal aata hai