jab se ki buton se aashna hun

jab se ki butoñ se āshnā huuñ

begāna ḳhudā.ī se huā huuñ

kyuuñ kar kahūñ ārif-e-ḳhudā huuñ

āgāh nahīñ ki aap kyā huuñ

jab hijr meñ baaġh ko gayā huuñ

maiñ ātish-e-gul meñ jal-bujhā huuñ

furqat meñ jo sar paTak rahā huuñ

mashġhūl-e-namāz-e-kibriyā huuñ

muñh zard hai tinke chun rahā huuñ

ai vahshat kyā maiñ kahrubā huuñ

begāna huuñ kyuuñ kar āshnā se

begānoñ se maiñ bhī āshnā huuñ

muñh un kā nahīñ hai shukr varna

har but kahtā ki maiñ ḳhudā huuñ

ummīd-e-visāl ab kahāñ hai

us gul se ba-rañg-e-bū judā huuñ

kyuuñ dost na ḳhush hoñ jaa.e mātam

sīmāb kī tarah mar gayā huuñ

ḳhilqat ḳhush ho jo maiñ huuñ pāmāl

gulzār-e-jahāñ meñ kyā hinā huuñ

hañs dūñgā dam meñ misl-e-gul aap

ġhunche kī tarah se go ḳhafā huuñ

ātish-qadamī se jalte haiñ ḳhaar

ai qais maiñ vo barahna-pā huuñ

karte haiñ gurez mujh se manhūs

be-shubah maiñ sāya-e-humā huuñ

huuñ qāfila-e-adam se aage

is raah meñ nāla-e-darā huuñ

'nāsiḳh' kī ye iltijā hai yārab

mar jā.ūñ to ḳhāk-e-karbalā huuñ

jab se ki buton se aashna hun

begana KHudai se hua hun

kyun kar kahun aarif-e-KHuda hun

aagah nahin ki aap kya hun

jab hijr mein bagh ko gaya hun

main aatish-e-gul mein jal-bujha hun

furqat mein jo sar paTak raha hun

mashghul-e-namaz-e-kibriya hun

munh zard hai tinke chun raha hun

ai wahshat kya main kahruba hun

begana hun kyun kar aashna se

beganon se main bhi aashna hun

munh un ka nahin hai shukr warna

har but kahta ki main KHuda hun

ummid-e-visal ab kahan hai

us gul se ba-rang-e-bu juda hun

kyun dost na KHush hon jae matam

simab ki tarah mar gaya hun

KHilqat KHush ho jo main hun pamal

gulzar-e-jahan mein kya hina hun

hans dunga dam mein misl-e-gul aap

ghunche ki tarah se go KHafa hun

aatish-qadami se jalte hain KHar

ai qais main wo barahna-pa hun

karte hain gurez mujh se manhus

be-shubah main saya-e-huma hun

hun qafila-e-adam se aage

is rah mein nala-e-dara hun

'nasiKH' ki ye iltija hai yarab

mar jaun to KHak-e-karbala hun