jab se maddham meri qismat ke sitare hue hain

jab se maddham mirī qismat ke sitāre hue haiñ

naf' ke naam pe bhī mujh ko ḳhasāre hue haiñ

ek tum ho ki muqaddar ke sikandar Thahre

ek ham haiñ ki jo hālāt ke maare hue haiñ

bhuul jaate haiñ har ik dāġh-e-jigar 'iid ke din

par vo lamhe jo tire saath guzāre hue haiñ

ek jhapkī meñ hī mumkin hai ki kankar ban jaa.eñ

ye jo kuchh log tirī aañkh ke taare hue haiñ

baat kuchh yuuñ hai ki kuchh yaad nahīñ hai ham ko

haañ magar raat ko ruḳhsat jo sitāre hue haiñ

ye sitāre tirī tashbīh ke qābil nahīñ haiñ

ye sitāre to tire sar ke utāre hue haiñ

kyā hameñ bhī koī ā.īna banā saktā hai

ham ne sahrā meñ ka.ī saal guzāre hue haiñ

vaqt mil jaa.e to ham par bhī karam kar denā

kab se dāman tirī chaukhaT pe pasāre hue haiñ

jab se maddham meri qismat ke sitare hue hain

naf' ke nam pe bhi mujh ko KHasare hue hain

ek tum ho ki muqaddar ke sikandar Thahre

ek hum hain ki jo haalat ke mare hue hain

bhul jate hain har ek dagh-e-jigar 'id ke din

par wo lamhe jo tere sath guzare hue hain

ek jhapki mein hi mumkin hai ki kankar ban jaen

ye jo kuchh log teri aankh ke tare hue hain

baat kuchh yun hai ki kuchh yaad nahin hai hum ko

han magar raat ko ruKHsat jo sitare hue hain

ye sitare teri tashbih ke qabil nahin hain

ye sitare to tere sar ke utare hue hain

kya hamein bhi koi aaina bana sakta hai

hum ne sahra mein kai sal guzare hue hain

waqt mil jae to hum par bhi karam kar dena

kab se daman teri chaukhaT pe pasare hue hain