jab se mere dil mein aa kar ishq ka thana hua

jab se mere dil meñ aa kar 'ishq kā thānā huā

hosh-o-sabr-o-aql-o-dīñ kyā sab se begāna huā

dil hamārā ḳhāna-e-allāh gar mash.hūr thā

so butoñ ke 'ishq meñ ab ye bhī but-ḳhāna huā

qissa-e-farhād-o-majnūñ raat din paḌhte the ham

so to vo maazī paḌā ab apnā afsāna huā

raat din ye soch rahtā hai mire dil ke ta.iiñ

ai ḳhudā yaañ se vo jā kar kis kā ham khānā huā

kyā haqīqat pūchhtā hai merī tanhā.ī kī tū

jab ki mere paas se pyāre tirā jaanā huā

bhuuk pyaas aur niiñd sab jaatī rahī ai jān-e-man

balki in logoñ meñ maiñ mash.hūr dīvānā huā

shaiḳh jī aayā na vā'de par to ab 'āsif' kā yaar

tum to ḳhush hoge tumhārā hī jo farmānā huā

jab se mere dil mein aa kar 'ishq ka thana hua

hosh-o-sabr-o-aql-o-din kya sab se begana hua

dil hamara KHana-e-allah gar mashhur tha

so buton ke 'ishq mein ab ye bhi but-KHana hua

qissa-e-farhad-o-majnun raat din paDhte the hum

so to wo mazi paDa ab apna afsana hua

raat din ye soch rahta hai mere dil ke tain

ai KHuda yan se wo ja kar kis ka hum khana hua

kya haqiqat puchhta hai meri tanhai ki tu

jab ki mere pas se pyare tera jaana hua

bhuk pyas aur nind sab jati rahi ai jaan-e-man

balki in logon mein main mashhur diwana hua

shaiKH ji aaya na wa'de par to ab 'asif' ka yar

tum to KHush hoge tumhaara hi jo farmana hua