jab se zindagi hua dil gardish-e-taqdir ka

jab se zindagī huā dil gardish-e-taqdīr kā

roz baḌh jaatā hai ik halqa mirī zanjīr kā

mere hisse meñ kahāñ thiiñ ujlatoñ kī manzileñ

mere qadmoñ ko sadā rasta milā tāḳhīr se

kis liye barbādiyoñ kā dil ko hai itnā malāl

aur kyā andāza ho ḳhamyāza-e-ta.amīr kā

ḳhūn-e-dil jin kī gavāhī meñ huā nazr-e-vafā

rañg to vo uḌ ga.e ab kyā karūñ tasvīr kā

maiñ ne samjhā terī chāhat ko faqat in.āmāt-e-zīst

mujh ko andāza na thā is jurm is ta.azīr kā

ek lab tak hī na pahuñchī jo du'ā thī mustajāb

kis qadar charchā huā hai āh-e-be-tāsīr kā

lafz kī hurmat muqaddam hai dil-o-jāñ se mujhe

sach ta'āruf hai mire har sher har tahrīr kā

jab se zindagi hua dil gardish-e-taqdir ka

roz baDh jata hai ek halqa meri zanjir ka

mere hisse mein kahan thin ujlaton ki manzilen

mere qadmon ko sada rasta mila taKHir se

kis liye barbaadiyon ka dil ko hai itna malal

aur kya andaza ho KHamyaza-e-tamir ka

KHun-e-dil jin ki gawahi mein hua nazr-e-wafa

rang to wo uD gae ab kya karun taswir ka

main ne samjha teri chahat ko faqat inamat-e-zist

mujh ko andaza na tha is jurm is tazir ka

ek lab tak hi na pahunchi jo du'a thi mustajab

kis qadar charcha hua hai aah-e-be-tasir ka

lafz ki hurmat muqaddam hai dil-o-jaan se mujhe

sach ta'aruf hai mere har sher har tahrir ka