jab tak hum hain mumkin hi nahin na-mahram mahram ho jaen

jab tak ham haiñ mumkin hī nahīñ nā-mahram mahram ho jaa.eñ

aatā hai unheñ ġhussa aa.e hote haiñ vo barham ho jaa.eñ

duniyā-e-masarrat ke lamhe ab is se kyā kam ho jaa.eñ

hoñToñ par hañsī aane vaalī ho āñkheñ pur-nam ho jaa.eñ

ham us ke aañkh se ojhal hone kā matlab kyā lete haiñ

vo aañkh se ojhal ho to nazāre darham-barham ho jaa.eñ

hālāt ko har har mauqa.a par ik bhes badalnā lāzim hai

kāñToñ meñ dāman ban jaa.eñ phūloñ par shabnam ho jaa.eñ

us kāfir aisī mastāna raftār kahāñ se lā.eñge

ash.ār mujassam ho jaa.eñ afkār munazzam ho jaa.eñ

un kī rahmat se duur nahīñ lekin is par majbūr nahīñ

iġhmāz kareñ har laġhzish par sajdoñ par barham ho jaa.eñ

ahbāb ko aise gulshan meñ fitne baune se kyā hāsil

jab do dil mohkam ho jaa.eñ jab va.ade paiham ho jaa.eñ

us vaqt bhī zohd-o-taqva par qaa.em rah jā.ūñ tab kahnā

jis vaqt mujhe mai-noshī ke asbāb farāham ho jaa.eñ

samjho ki javānī ḳhvāb meñ hai ruḳh bāñhoñ kī mehrāb meñ hai

jab taare dhīme paḌ jaa.eñ jab sham.eñ maddham ho jaa.eñ

un ḳhvāb-ālūda āñkhoñ kī tarkīb samajh meñ aa jaa.e

ai 'shād' agar paimānoñ meñ mai-ḳhāne mudġham ho jaa.eñ

jab tak hum hain mumkin hi nahin na-mahram mahram ho jaen

aata hai unhen ghussa aae hote hain wo barham ho jaen

duniya-e-masarrat ke lamhe ab is se kya kam ho jaen

honTon par hansi aane wali ho aankhen pur-nam ho jaen

hum us ke aankh se ojhal hone ka matlab kya lete hain

wo aankh se ojhal ho to nazare darham-barham ho jaen

haalat ko har har mauqa par ek bhes badalna lazim hai

kanTon mein daman ban jaen phulon par shabnam ho jaen

us kafir aisi mastana raftar kahan se laenge

ashaar mujassam ho jaen afkar munazzam ho jaen

un ki rahmat se dur nahin lekin is par majbur nahin

ighmaz karen har laghzish par sajdon par barham ho jaen

ahbab ko aise gulshan mein fitne baune se kya hasil

jab do dil mohkam ho jaen jab wade paiham ho jaen

us waqt bhi zohd-o-taqwa par qaem rah jaun tab kahna

jis waqt mujhe mai-noshi ke asbab faraham ho jaen

samjho ki jawani KHwab mein hai ruKH banhon ki mehrab mein hai

jab tare dhime paD jaen jab shamen maddham ho jaen

un KHwab-aluda aankhon ki tarkib samajh mein aa jae

ai 'shad' agar paimanon mein mai-KHane mudgham ho jaen