jab tak junun junun hai gham-e-agahi bhi hai

jab tak junūñ junūñ hai ġham-e-āgahī bhī hai

yā'nī asīr-e-naġhma mirī be-ḳhudī bhī hai

khilte haiñ phuul jin ke tabassum ke vāste

shabnam meñ un ke 'aks kī āzurdagī bhī hai

kuchh sā'atoñ kā rang mire saath saath hai

vo nik.hat-e-bahār magar ajnabī bhī hai

zinda huuñ maiñ ki aag jahannam kī ban sakūñ

firdaus-e-ārzū mire dil kī kalī bhī hai

is yaad kā bhañvar mere ehsās meñ rahā

iz.hār-e-mauj mauj kī nā-guftanī bhī hai

palkoñ pe chāñdnī ke takallum kī aañch thī

hoñToñ pe guftugū ke liye tishnagī bhī hai

kyuuñ tīrgī se is qadar mānūs huuñ 'zafar'

ik sham-e-rah-guzar ki sahar tak jalī bhī hai

jab tak junun junun hai gham-e-agahi bhi hai

ya'ni asir-e-naghma meri be-KHudi bhi hai

khilte hain phul jin ke tabassum ke waste

shabnam mein un ke 'aks ki aazurdagi bhi hai

kuchh sa'aton ka rang mere sath sath hai

wo nikhat-e-bahaar magar ajnabi bhi hai

zinda hun main ki aag jahannam ki ban sakun

firdaus-e-arzu mere dil ki kali bhi hai

is yaad ka bhanwar mere ehsas mein raha

izhaar-e-mauj mauj ki na-guftani bhi hai

palkon pe chandni ke takallum ki aanch thi

honTon pe guftugu ke liye tishnagi bhi hai

kyun tirgi se is qadar manus hun 'zafar'

ek sham-e-rah-guzar ki sahar tak jali bhi hai