jab tak ki teri galiyan khane ke nahin hum

jab tak ki tirī gāliyāñ khāne ke nahīñ ham

uTh kar tire darvāze se jaane ke nahīñ ham

jitnā ki ye duniyā meñ hameñ ḳhvār rakhe hai

itne to gunahgār zamāne ke nahīñ ham

ho jāveñge pāmāl guzar jāveñge jī se

par sar tire qadmoñ se uThāne ke nahīñ ham

aane do use jis ke liye chaak kiyā hai

nāseh se garebāñ ko silāne ke nahīñ ham

jab tak ki na chhiḌkegā gulāb aap vo aa kar

is ġhash se kabhī hosh meñ aane ke nahīñ ham

jāveñge sabā baaġh meñ gul-gasht-e-chaman ko

par terī tarah ḳhaak uḌāne ke nahīñ ham

ai 'mus.hafī' ḳhush hone kā nahīñ ham se vo jab tak

sar kaaT ke nazr us ko bhijāne ke nahīñ ham

jab tak ki teri galiyan khane ke nahin hum

uTh kar tere darwaze se jaane ke nahin hum

jitna ki ye duniya mein hamein KHwar rakhe hai

itne to gunahgar zamane ke nahin hum

ho jawenge pamal guzar jawenge ji se

par sar tere qadmon se uThane ke nahin hum

aane do use jis ke liye chaak kiya hai

naseh se gareban ko silane ke nahin hum

jab tak ki na chhiDkega gulab aap wo aa kar

is ghash se kabhi hosh mein aane ke nahin hum

jawenge saba bagh mein gul-gasht-e-chaman ko

par teri tarah KHak uDane ke nahin hum

ai 'mushafi' KHush hone ka nahin hum se wo jab tak

sar kaT ke nazr us ko bhijaane ke nahin hum