jab tak safed aandhi ke jhonke chale na the

jab tak safed āñdhī ke jhoñke chale na the

itne ghane daraḳhtoñ se patte gire na the

iz.hār par to pahle bhī pābandiyāñ na thiiñ

lekin baḌoñ ke sāmne ham bolte na the

un ke bhī apne ḳhvāb the apnī zarūrateñ

ham-sā.e kā magar vo galā kāTte na the

pahle bhī log milte the lekin ta.alluqāt

añgḌā.ī kī tarah to kabhī TūTte na the

pakke gharoñ ne niiñd bhī āñkhoñ kī chhīn lī

kachche gharoñ meñ raat ko ham jāgte na the

rahte the dāstānoñ ke māhaul meñ magar

kyā log the ki jhuuT kabhī bolte na the

'az.har' vo maktaboñ ke paḌhe mo'atabar the log

baisākhiyoñ pe sirf sanad kī khaḌe na the

jab tak safed aandhi ke jhonke chale na the

itne ghane daraKHton se patte gire na the

izhaar par to pahle bhi pabandiyan na thin

lekin baDon ke samne hum bolte na the

un ke bhi apne KHwab the apni zaruraten

ham-sae ka magar wo gala kaTte na the

pahle bhi log milte the lekin talluqat

angDai ki tarah to kabhi TuTte na the

pakke gharon ne nind bhi aankhon ki chhin li

kachche gharon mein raat ko hum jagte na the

rahte the dastanon ke mahaul mein magar

kya log the ki jhuT kabhi bolte na the

'azhar' wo maktabon ke paDhe mo'atabar the log

baisakhiyon pe sirf sanad ki khaDe na the