jab talak charb na jun sham-e-zaban kijiyega

jab talak charb na juuñ sham-e-zabāñ kījiyegā

sarguzisht apnī kā kyā ḳhaak bayāñ kījiyegā

barq saañ hañs ke jo vā aap dahāñ kījiyegā

ma.anī-e-maḳhzan-e-asrār ayaañ kījiyegā

dil ko jab mā.il-e-chashmān-e-butāñ kījiyegā

turfat-ul-ain meñ sair-e-do-jahāñ kījiyegā

dil-e-sad-pāra mirā shīsha-e-ba-shikasta hai

is ko pāmāl zarā dekh ke haañ kījiyegā

dil-e-pur-ābla laayā huuñ dikhāne tum ko

band ai shīsha-garo! apnī dukāñ kījiyegā

kyuuñ lagāte ho mire sīna-e-sad-chāk ko haath

chashm-e-sozan se nazar baḳhiya-garāñ kījiyegā

tum ko apnā dil-e-pur-dāġh dikhāte jo kabhī

sair-e-gulshan na phir ai lāla-ruḳhāñ kījiyegā

haath se mohtasib-e-dahr ke ik din barpā

sar pe shīshe ke ḳharābī na yahāñ kījiyegā

aabrū madd-e-nazar ham ko hai terī yaañ tak

ashk ko rokiyegā zabt-e-fuġhāñ kījiyegā

kyūñki nargis tirī āñkhoñ se kare ham-chashmī

jab tak us kā na ilāj-e-yaraqāñ kījiyegā

rū-kashī dekh na kar gosha-nashīnoñ se falak

har tarah se tirī ḳhātir pa.e-shāñ kījiyegā

nāvak-e-āh lagā.eñge piyāpe tujh par

qadd-e-ḳham-gashta ko jab apne kamāñ kījiyegā

abr-e-naisāñ kī bhī jhaḌ jā.egī pal meñ sheḳhī

dīda-e-tar ko agar ashk-fishāñ kījiyegā

dil meñ kuchh ye na samajhnā ki hamārā hai daur

jāmadārī meñ shak ai bāda-kashāñ kījiyegā

dil meñ rakhte ho ḳhayāl us kī kamar kā jo 'nasīr'

lā-makāñ meñ kahīñ kyā jā ke makāñ kījiyegā

jab talak charb na jun sham-e-zaban kijiyega

sarguzisht apni ka kya KHak bayan kijiyega

barq san hans ke jo wa aap dahan kijiyega

mani-e-maKHzan-e-asrar ayan kijiyega

dil ko jab mail-e-chashman-e-butan kijiyega

turfat-ul-ain mein sair-e-do-jahan kijiyega

dil-e-sad-para mera shisha-e-ba-shikasta hai

is ko pamal zara dekh ke han kijiyega

dil-e-pur-abla laya hun dikhane tum ko

band ai shisha-garo! apni dukan kijiyega

kyun lagate ho mere sina-e-sad-chaak ko hath

chashm-e-sozan se nazar baKHiya-garan kijiyega

tum ko apna dil-e-pur-dagh dikhate jo kabhi

sair-e-gulshan na phir ai lala-ruKHan kijiyega

hath se mohtasib-e-dahr ke ek din barpa

sar pe shishe ke KHarabi na yahan kijiyega

aabru madd-e-nazar hum ko hai teri yan tak

ashk ko rokiyega zabt-e-fughan kijiyega

kyunki nargis teri aankhon se kare ham-chashmi

jab tak us ka na ilaj-e-yaraqan kijiyega

ru-kashi dekh na kar gosha-nashinon se falak

har tarah se teri KHatir pae-shan kijiyega

nawak-e-ah lagaenge piyape tujh par

qadd-e-KHam-gashta ko jab apne kaman kijiyega

abr-e-naisan ki bhi jhaD jaegi pal mein sheKHi

dida-e-tar ko agar ashk-fishan kijiyega

dil mein kuchh ye na samajhna ki hamara hai daur

jamadari mein shak ai baada-kashan kijiyega

dil mein rakhte ho KHayal us ki kamar ka jo 'nasir'

la-makan mein kahin kya ja ke makan kijiyega