jab talak gham jawan nahin hota

jab talak ġham javāñ nahīñ hotā

sabr kā imtihāñ nahīñ hotā

chheḌ mat jazba-e-mujāhid ko

ye kabhī nā-tavāñ nahīñ hotā

jāntā huuñ qarīb se us ko

be-ġharaz mehrbāñ nahīñ hotā

aise andāz se vo miltā hai

dushmanī kā gumāñ nahīñ hotā

ho mahal yā ġharīb kī kuTiyā

ġham kabhī be-makāñ nahīñ hotā

ham meñ shāmil koī munāfiq hai

dost yuuñ bad-gumāñ nahīñ hotā

laakh ta.alīm-yāfta hī sahī

kam nazar nukta-dāñ nahīñ hotā

band kar ab to shuġhl-e-nasl-kushī

dekh vaqt ek saañ nahīñ hotā

azm ko aazmā liyā 'muḳhlis'

rā.egāñ imtihāñ nahīñ hotā

jab talak gham jawan nahin hota

sabr ka imtihan nahin hota

chheD mat jazba-e-mujahid ko

ye kabhi na-tawan nahin hota

jaanta hun qarib se us ko

be-gharaz mehrban nahin hota

aise andaz se wo milta hai

dushmani ka guman nahin hota

ho mahal ya gharib ki kuTiya

gham kabhi be-makan nahin hota

hum mein shamil koi munafiq hai

dost yun bad-guman nahin hota

lakh talim-yafta hi sahi

kam nazar nukta-dan nahin hota

band kar ab to shughl-e-nasl-kushi

dekh waqt ek san nahin hota

azm ko aazma liya 'muKHlis'

raegan imtihan nahin hota