jab talak tir tera aawe hai naKHchir talak

jab talak tiir tirā aave hai naḳhchīr talak

le ye naḳhchīr hī aa pahuñchā tire tiir talak

dast-o-pā maare bahut chāh-e-zanaḳh meñ dil ne

haath lekin na gayā zulf kī zanjīr talak

shukr-sad-shukr ki uqde yuuñ hī hal hote ga.e

kaam pahuñchā na hamārā kabhī tadbīr talak

us kī sūrat kā divānā huuñ ki jis kā ḳhat-o-ḳhāl

na gayā mānī-o-bahzād kī tahrīr talak

hai yahī shauq shahādat kā agar dil meñ to ishq

le hī pahuñchegā hameñ bhī tirī shamshīr talak

ik musalmān kā jī jaatā hai ulfat meñ tirī

jā kahe koī ye us kāfir-e-be-pīr talak

jab talak zar hai to sab koī hai phir koī nahīñ

sach hai makkhī bhī rahe hai shakar-o-shīr talak

is tarah baiTh gayā ḳhāna-e-dil merā ki bas

kaam phir us kā na pahuñchā kabhī ta.amīr talak

ḳhuun ho ho ke Tapaktā hai ye sau rañg se dil

tā kisī rañg meñ pahuñche tirī tasvīr talak

maiñ bhī ik ma.anī-e-pechīda ajab thā ki 'hasan'

guftugū merī na pahuñchī kabhī taqrīr talak

jab talak tir tera aawe hai naKHchir talak

le ye naKHchir hi aa pahuncha tere tir talak

dast-o-pa mare bahut chah-e-zanaKH mein dil ne

hath lekin na gaya zulf ki zanjir talak

shukr-sad-shukr ki uqde yun hi hal hote gae

kaam pahuncha na hamara kabhi tadbir talak

us ki surat ka diwana hun ki jis ka KHat-o-KHal

na gaya mani-o-bahzad ki tahrir talak

hai yahi shauq shahadat ka agar dil mein to ishq

le hi pahunchega hamein bhi teri shamshir talak

ek musalman ka ji jata hai ulfat mein teri

ja kahe koi ye us kafir-e-be-pir talak

jab talak zar hai to sab koi hai phir koi nahin

sach hai makkhi bhi rahe hai shakar-o-shir talak

is tarah baiTh gaya KHana-e-dil mera ki bas

kaam phir us ka na pahuncha kabhi tamir talak

KHun ho ho ke Tapakta hai ye sau rang se dil

ta kisi rang mein pahunche teri taswir talak

main bhi ek mani-e-pechida ajab tha ki 'hasan'

guftugu meri na pahunchi kabhi taqrir talak