jab tasawwur mein koi mah-jabin hota hai

jab tasavvur meñ koī māh-jabīñ hotā hai

raat hotī hai magar din kā yaqīñ hotā hai

uf vo bedād ināyat bhī tasadduq jis par

haa.e vo ġham jo masarrat se hasīñ hotā hai

hijr kī raat fusūñ-kāri-e-zulmat mat pūchh

sham.a jaltī hai magar nuur nahīñ hotā hai

duur tak ham ne jo dekhā to ye mālūm huā

ki vo insāñ kī rag-e-jāñ se qarīñ hotā hai

ishq meñ mārka-e-qalb-o-nazar kyā kahiye

choT lagtī hai kahīñ dard kahīñ hotā hai

ham ne dekhe haiñ vo aalam bhī mohabbat meñ 'hafīz'

āstāñ ḳhud jahāñ mushtāq-e-jabīñ hotā hai

jab tasawwur mein koi mah-jabin hota hai

raat hoti hai magar din ka yaqin hota hai

uf wo bedad inayat bhi tasadduq jis par

hae wo gham jo masarrat se hasin hota hai

hijr ki raat fusun-kari-e-zulmat mat puchh

shama jalti hai magar nur nahin hota hai

dur tak hum ne jo dekha to ye malum hua

ki wo insan ki rag-e-jaan se qarin hota hai

ishq mein marka-e-qalb-o-nazar kya kahiye

choT lagti hai kahin dard kahin hota hai

hum ne dekhe hain wo aalam bhi mohabbat mein 'hafiz'

aastan KHud jahan mushtaq-e-jabin hota hai