jab tawaif shah ki rani hui

jab tavā.if shaah kī raanī huī

ghuñghruoñ kī nazar sultānī huī

tere dam se ghar thā jannat kī misāl

tū gayā jañgal sī vīrānī huī

aaj tak duniyā na de paa.ī misāl

qarn-e-avval meñ vo sultānī huī

dekhiye insān kī fir.auniyat

bādshāhī zill-e-sub.hānī huī

barf jaisī thī hamārī zindagī

lamha lamha ghul ga.ī paanī huī

baiThe baiThe aa gayā un kā ḳhayāl

fikr kī saada qabā dhānī huī

chauñk uTThā niiñd merī uḌ ga.ī

jab sunī āvāz pahchānī huī

chhoḌ dī 'vāsiq' kitāb-e-āgahī

tab to jiine meñ pareshānī huī

jab tawaif shah ki rani hui

ghunghruon ki nazar sultani hui

tere dam se ghar tha jannat ki misal

tu gaya jangal si virani hui

aaj tak duniya na de pai misal

qarn-e-awwal mein wo sultani hui

dekhiye insan ki firauniyat

baadshahi zill-e-subhani hui

barf jaisi thi hamari zindagi

lamha lamha ghul gai pani hui

baiThe baiThe aa gaya un ka KHayal

fikr ki sada qaba dhani hui

chaunk uTTha nind meri uD gai

jab suni aawaz pahchani hui

chhoD di 'wasiq' kitab-e-agahi

tab to jine mein pareshani hui