jab tere KHwab se bedar hua karte the

jab tire ḳhvāb se bedār huā karte the

ham kisī rañj se do-chār huā karte the

aa.ine chashm-e-tahayyur se hameñ dekhte the

ham ki jab tere giraftār huā karte the

aaj ma.alūm huā terī zarūrat hī na thī

ham yūñhī tere talabgār huā karte the

ab to ham roz unheñ paañv tale rauñdte haiñ

ye hī raste the jo dushvār huā karte the

daulat-e-ishq se ham kaam chalāte the miyāñ

bas yahī dirham-o-dīnār huā karte the

bārhā yuuñ bhī huā Duube hue ḳhvāb mire

us kī āñkhoñ se numūdār huā karte the

aap hī aap kahānī se nikalte jaate

jo mire jaise adākār huā karte the

lo ki ham bojh uThāte haiñ zamīñ se apnā

ham kabhī is pe bahut baar huā karte the

aaj jo log ḳharīdār haiñ tere 'az.har'

kal yahī mere ḳharīdār huā karte the

jab tere KHwab se bedar hua karte the

hum kisi ranj se do-chaar hua karte the

aaine chashm-e-tahayyur se hamein dekhte the

hum ki jab tere giraftar hua karte the

aaj malum hua teri zarurat hi na thi

hum yunhi tere talabgar hua karte the

ab to hum roz unhen panw tale raundte hain

ye hi raste the jo dushwar hua karte the

daulat-e-ishq se hum kaam chalate the miyan

bas yahi dirham-o-dinar hua karte the

barha yun bhi hua Dube hue KHwab mere

us ki aankhon se numudar hua karte the

aap hi aap kahani se nikalte jate

jo mere jaise adakar hua karte the

lo ki hum bojh uThate hain zamin se apna

hum kabhi is pe bahut bar hua karte the

aaj jo log KHaridar hain tere 'azhar'

kal yahi mere KHaridar hua karte the