جب تری بزم سے بادیدۂ نم اٹھتے ہیں

جب تری بزم سے بادیدۂ نم اٹھتے ہیں

اب نہیں آئیں گے یہ کھا کے قسم اٹھتے ہیں

ہم وہ بیزار زمانہ ہیں کہیں جاتے نہیں

بیٹھ جائیں کسی محفل میں تو کم اٹھتے ہیں

کتنے مظلوم ہیں ہم چاہنے والوں میں میاں

ہم پہ یاروں کے یہاں دست ستم اٹھتے ہیں

آپ جانے کا تکلف نہ کریں بہر خدا

آئیے بیٹھیے اس بزم سے ہم اٹھتے ہیں

ہم سے مے خوار کو کیا توبہ کی تلقین یہاں

ہاتھ میں جام لیے پیر حرم اٹھتے ہیں

سادگی دیدنی ہوتی ہے وہ جب کہتے ہیں

آج اس دنیا سے مریمؔ کی قسم اٹھتے ہیں