jab un ke kuche mein jaana paDta hai

jab un ke kūche meñ jaanā paḌtā hai

rāhoñ meñ be-dard zamāna paḌtā hai

bātoñ kī qīmat jab ghaTne lagtī hai

tab ashkoñ ko kaam meñ laanā paḌtā hai

rahbar bas rasta batlāte rahte haiñ

manzil tak raahī ko jaanā paḌtā hai

puḳhta kar le ai zāhid apnā īmāñ

masjid se pahle mai-ḳhāna paḌtā hai

aise bhī gul haiñ jin ko is duniyā meñ

khilne se pahle murjhānā paḌtā hai

yūñhī ḳhūñ-rezī thoḌī ho jaatī hai

pahle nafrat ko uksānā paḌtā hai

dil meñ hai to bas dil meñ hī mat rakhiye

is duniyā meñ pyaar jatānā paḌtā hai hai

pahle aañsū se dil halkā hotā thā

ab āñkhoñ se ḳhuun bahānā paḌtā hai

jab un ke kuche mein jaana paDta hai

rahon mein be-dard zamana paDta hai

baaton ki qimat jab ghaTne lagti hai

tab ashkon ko kaam mein lana paDta hai

rahbar bas rasta batlate rahte hain

manzil tak rahi ko jaana paDta hai

puKHta kar le ai zahid apna iman

masjid se pahle mai-KHana paDta hai

aise bhi gul hain jin ko is duniya mein

khilne se pahle murjhana paDta hai

yunhi KHun-rezi thoDi ho jati hai

pahle nafrat ko uksana paDta hai

dil mein hai to bas dil mein hi mat rakhiye

is duniya mein pyar jatana paDta hai hai

pahle aansu se dil halka hota tha

ab aankhon se KHun bahana paDta hai