jab usko dekhte rahne se thakne lagta hun

jab us ko dekhte rahne se thakne lagtā huuñ

to apne ḳhvāb kī palkeñ jhapakne lagtā huuñ

jise bhī pyaas bujhānī ho mere paas rahe

kabhī bhī apne laboñ se chhalakne lagtā huuñ

havā-e-hijr dikhātī hai sabz bāġh-e-visāl

to bāġh-e-vahm meñ apne mahakne lagtā huuñ

chhiḌaknī paḌtī hai ḳhud par kisī badan kī aag

maiñ apnī aag meñ jab bhī dahakne lagtā huuñ

maiñ ḳhud ko chakh nahīñ paatā ki toḌ letī hai

mujhe havā-e-ḳhizāñ jab bhī pakne lagtā huuñ

badan kī kaan se hiire nikalne lagte haiñ

maiñ apnī raat meñ aksar chamakne lagtā huuñ

vo ek manzar-e-nāpaid hai ki jis ke liye

maiñ aañkh hone kī ḳhātir phaḌakne lagtā huuñ

parinde bolne lagte haiñ mujh meñ raat ga.e

to shāḳh-e-sher pe maiñ bhī chahakne lagtā huuñ

jo kār-nāma kabhī koī mujh se ho jaa.e

to apnī piiTh maiñ ḳhud hī thapakne lagtā huuñ

sunāne lagtā hai ash.ār-e-ishq jab 'ehsās'

maiñ us ke sāmne dil sā dhaḌakne lagtā huuñ

jab us ko dekhte rahne se thakne lagta hun

to apne KHwab ki palken jhapakne lagta hun

jise bhi pyas bujhani ho mere pas rahe

kabhi bhi apne labon se chhalakne lagta hun

hawa-e-hijr dikhati hai sabz bagh-e-visal

to bagh-e-wahm mein apne mahakne lagta hun

chhiDakni paDti hai KHud par kisi badan ki aag

main apni aag mein jab bhi dahakne lagta hun

main KHud ko chakh nahin pata ki toD leti hai

mujhe hawa-e-KHizan jab bhi pakne lagta hun

badan ki kan se hire nikalne lagte hain

main apni raat mein aksar chamakne lagta hun

wo ek manzar-e-napaid hai ki jis ke liye

main aankh hone ki KHatir phaDakne lagta hun

parinde bolne lagte hain mujh mein raat gae

to shaKH-e-sher pe main bhi chahakne lagta hun

jo kar-nama kabhi koi mujh se ho jae

to apni piTh main KHud hi thapakne lagta hun

sunane lagta hai ashaar-e-ishq jab 'ehsas'

main us ke samne dil sa dhaDakne lagta hun