jab yas hui to aahon ne sine se nikalna chhoD diya

jab yaas huī to aahoñ ne siine se nikalnā chhoḌ diyā

ab ḳhushk-mizāj āñhkeñ bhī huiiñ dil ne bhī machalnā chhoḌ diyā

navak-faganī se zālim kī jañgal meñ hai ik sannāTā sā

murġhān-e-ḳhush-alhāñ ho ga.e chup aahū ne uchhalnā chhoḌ diyā

kyuuñ kibr-o-ġhurūr is daur pe hai kyuuñ dost falak ko samjhā hai

gardish se ye apnī baaz aayā yā rañg badalnā chhoḌ diyā

badlī vo havā guzrā vo samāñ vo raah nahīñ vo log nahīñ

tafrīh kahāñ aur sair kujā ghar se bhī nikalnā chhoḌ diyā

vo soz-o-gudāz us mahfil meñ baaqī na rahā andher huā

parvānoñ ne jalnā chhoḌ diyā sham.oñ ne pighalnā chhoḌ diyā

har gaam pe chand āñhkeñ nigarāñ har moḌ pe ik licence-talab

us park meñ āḳhir ai 'akbar' maiñ ne to Tahalnā chhoḌ diyā

kyā diin ko quvvat deñ ye javāñ jab hausla-afzāñ koī nahīñ

kyā hosh sambhāleñ ye laḌke ḳhud us ne sambhalnā chhoḌ diyā

iqbāl musā.id jab na rahā rakkhe ye qadam jis manzil meñ

ashjār se saaya duur huā chashmoñ ne ubalnā chhoḌ diyā

allāh kī raah ab tak hai khulī āsār-o-nishāñ sab qaa.em haiñ

allāh ke bandoñ ne lekin us raah meñ chalnā chhoḌ diyā

jab sar meñ havā-e-tā.at thī sarsabz shajar ummīd kā thā

jab sar-sar-e-isyāñ chalne lagī is peḌ ne phalnā chhoḌ diyā

us hūr-laqā ko ghar laa.e ho tum ko mubārak ai 'akbar'

lekin ye qayāmat kī tum ne ghar se jo nikalnā chhoḌ diyā

jab yas hui to aahon ne sine se nikalna chhoD diya

ab KHushk-mizaj aanhken bhi huin dil ne bhi machalna chhoD diya

nawak-fagani se zalim ki jangal mein hai ek sannaTa sa

murghan-e-KHush-alhan ho gae chup aahu ne uchhalna chhoD diya

kyun kibr-o-ghurur is daur pe hai kyun dost falak ko samjha hai

gardish se ye apni baz aaya ya rang badalna chhoD diya

badli wo hawa guzra wo saman wo rah nahin wo log nahin

tafrih kahan aur sair kuja ghar se bhi nikalna chhoD diya

wo soz-o-gudaz us mahfil mein baqi na raha andher hua

parwanon ne jalna chhoD diya shamon ne pighalna chhoD diya

har gam pe chand aanhken nigaran har moD pe ek licence-talab

us park mein aaKHir ai 'akbar' main ne to Tahalna chhoD diya

kya din ko quwwat den ye jawan jab hausla-afzan koi nahin

kya hosh sambhaalen ye laDke KHud us ne sambhalna chhoD diya

iqbaal musaid jab na raha rakkhe ye qadam jis manzil mein

ashjar se saya dur hua chashmon ne ubalna chhoD diya

allah ki rah ab tak hai khuli aasar-o-nishan sab qaem hain

allah ke bandon ne lekin us rah mein chalna chhoD diya

jab sar mein hawa-e-taat thi sarsabz shajar ummid ka tha

jab sar-sar-e-isyan chalne lagi is peD ne phalna chhoD diya

us hur-laqa ko ghar lae ho tum ko mubarak ai 'akbar'

lekin ye qayamat ki tum ne ghar se jo nikalna chhoD diya