jab ye aalam ho to likhiye lab-o-ruKHsar pe KHak

jab ye aalam ho to likhiye lab-o-ruḳhsār pe ḳhaak

uḌtī hai ḳhāna-e-dil ke dar-o-dīvār pe ḳhaak

tū ne miTTī se ulajhne kā natīja dekhā

Daal dī mere badan ne tirī talvār pe ḳhaak

ham ne muddat se ulaT rakkhā hai kaasa apnā

dast-e-dādār tire dirham-o-dīnār pe ḳhaak

putliyāñ garmī-e-nazzāra se jal jaatī haiñ

aañkh kī ḳhair miyāñ raunaq-e-bāzār pe ḳhaak

jo kisī aur ne likkhā hai use kyā ma.alūm

lauh-e-taqdīr bajā chehra-e-aḳhbār pe ḳhaak

chaar dīvār-e-anāsir kī haqīqat kitnī

ye bhī ghar Duub gayā dīda-e-ḳhūñ-bār pe ḳhaak

pā-e-vahshat ne ajab naqsh banā.e the yahāñ

ai havā-e-sar-e-sahrā tirī raftār pe ḳhaak

ye ġhazal likh ke harīfoñ pe uḌā dī maiñ ne

jam rahī thī mire ā.īna-e-ash.ār pe ḳhaak

ye bhī dekho ki kahāñ kaun bulātā hai tumheñ

mahzar-e-shauq paḌho mahzar-e-sarkār pe ḳhaak

aap kyā naqd-e-do-ālam se ḳharīdeñge ise

ye to dīvāne kā sar hai sar-e-pindār pe ḳhaak

jab ye aalam ho to likhiye lab-o-ruKHsar pe KHak

uDti hai KHana-e-dil ke dar-o-diwar pe KHak

tu ne miTTi se ulajhne ka natija dekha

Dal di mere badan ne teri talwar pe KHak

hum ne muddat se ulaT rakkha hai kasa apna

dast-e-dadar tere dirham-o-dinar pe KHak

putliyan garmi-e-nazzara se jal jati hain

aankh ki KHair miyan raunaq-e-bazar pe KHak

jo kisi aur ne likkha hai use kya malum

lauh-e-taqdir baja chehra-e-aKHbar pe KHak

chaar diwar-e-anasir ki haqiqat kitni

ye bhi ghar Dub gaya dida-e-KHun-bar pe KHak

pa-e-wahshat ne ajab naqsh banae the yahan

ai hawa-e-sar-e-sahra teri raftar pe KHak

ye ghazal likh ke harifon pe uDa di main ne

jam rahi thi mere aaina-e-ashaar pe KHak

ye bhi dekho ki kahan kaun bulata hai tumhein

mahzar-e-shauq paDho mahzar-e-sarkar pe KHak

aap kya naqd-e-do-alam se KHaridenge ise

ye to diwane ka sar hai sar-e-pindar pe KHak