jab zara tez hawa hoti hai

jab zarā tez havā hotī hai

kaisī sunsān fazā hotī hai

ham ne dekhe haiñ vo sannāTe bhī

jab har ik saañs sadā hotī hai

dil kā ye haal huā tere baad

jaise vīrān sarā hotī hai

ronā aatā hai hameñ bhī lekin

is meñ tauhīn-e-vafā hotī hai

muñh-añdhere kabhī uTh kar dekho

kyā tar o taaza havā hotī hai

ajnabī dhyān kī har mauj ke saath

kis qadar tez havā hotī hai

ġham ke be-nūr guzargāhoñ meñ

ik kiran zauq-fazā hotī hai

ġham-gusār-e-safar-e-rāh-e-vafā

mizha-e-ābla-pā hotī hai

gulshan-e-fikr kī muñh-band kalī

shab-e-mahtāb meñ vā hotī hai

jab nikaltī hai nigār-e-shab-e-gul

muñh pe shabnam kī ridā hotī hai

hādsa hai ki ḳhizāñ se pahle

bū-e-gul gul se judā hotī hai

ik nayā daur janam letā hai

ek tahzīb fanā hotī hai

jab koī ġham nahīñ hotā 'nāsir'

bekalī dil kī sivā hotī hai

jab zara tez hawa hoti hai

kaisi sunsan faza hoti hai

hum ne dekhe hain wo sannaTe bhi

jab har ek sans sada hoti hai

dil ka ye haal hua tere baad

jaise viran sara hoti hai

rona aata hai hamein bhi lekin

is mein tauhin-e-wafa hoti hai

munh-andhere kabhi uTh kar dekho

kya tar o taza hawa hoti hai

ajnabi dhyan ki har mauj ke sath

kis qadar tez hawa hoti hai

gham ke be-nur guzargahon mein

ek kiran zauq-faza hoti hai

gham-gusar-e-safar-e-rah-e-wafa

mizha-e-abla-pa hoti hai

gulshan-e-fikr ki munh-band kali

shab-e-mahtab mein wa hoti hai

jab nikalti hai nigar-e-shab-e-gul

munh pe shabnam ki rida hoti hai

hadsa hai ki KHizan se pahle

bu-e-gul gul se juda hoti hai

ek naya daur janam leta hai

ek tahzib fana hoti hai

jab koi gham nahin hota 'nasir'

bekali dil ki siwa hoti hai