jabin-e-shauq par koi hua hai mehrban shayad

jabīn-e-shauq par koī huā hai mehrbāñ shāyad

pa.e sajda bulātā hai kisī kā āstāñ shāyad

dam-e-naz.a vo aa.e aur ziyārat ho ga.ī un kī

mukammal ho ga.ī ab zindagī kī dāstāñ shāyad

ḳhizāñ kā naam anjām-e-bahārāñ kī ḳhabar sun kar

gulistāñ se kināra-kash huā hai bāġhbāñ shāyad

hañsā karte haiñ aksar log dīvānoñ kī bātoñ par

jahāñ vaale nahīñ samjhe mohabbat kī zabāñ shāyad

haram se mujh ko raġhbat hai na but-ḳhāne se dilchaspī

mire sajdoñ kī qismat meñ hai un kā āstāñ shāyad

mohabbat mustaqil ik ġham hai jis ko jāntā huuñ maiñ

mirī duniyā meñ koī bhī nahīñ hai shādmāñ shāyad

qafas tak aa ga.e uḌte hue tinke nasheman ke

havā ke dosh par aayā yahāñ tak āshiyāñ shāyad

jabīn-e-bandagī jis dam banā.ī ḳhāliq-e-kul ne

usī ke saath Daalī hai binā-e-āstāñ shāyad

vafādārī ġhurūr-e-be-ruḳhī ko ḳhatm kar degī

ziyāda to nahīñ kuchh din raheñ vo bad-gumāñ shāyad

jo dushman kah rahā hai sab ġhalat us ko samajhte haiñ

haqīqat meñ vahī hai be-haqīqat dāstāñ shāyad

jahān-e-dil to hai nazdīk 'vāsil' duur kyuuñ jaao

isī duniyā meñ rahtā hai tumhārā mehrbāñ shāyad

ijāzat bāzyābī kī na de vo pāsbāñ shāyad

na pahuñche ḳhvāb-gāh-e-nāz tak merī fuġhāñ shāyad

jabin-e-shauq par koi hua hai mehrban shayad

pae sajda bulata hai kisi ka aastan shayad

dam-e-naza wo aae aur ziyarat ho gai un ki

mukammal ho gai ab zindagi ki dastan shayad

KHizan ka nam anjam-e-bahaaran ki KHabar sun kar

gulistan se kinara-kash hua hai baghban shayad

hansa karte hain aksar log diwanon ki baaton par

jahan wale nahin samjhe mohabbat ki zaban shayad

haram se mujh ko raghbat hai na but-KHane se dilchaspi

mere sajdon ki qismat mein hai un ka aastan shayad

mohabbat mustaqil ek gham hai jis ko jaanta hun main

meri duniya mein koi bhi nahin hai shadman shayad

qafas tak aa gae uDte hue tinke nasheman ke

hawa ke dosh par aaya yahan tak aashiyan shayad

jabin-e-bandagi jis dam banai KHaliq-e-kul ne

usi ke sath Dali hai bina-e-astan shayad

wafadari ghurur-e-be-ruKHi ko KHatm kar degi

ziyaada to nahin kuchh din rahen wo bad-guman shayad

jo dushman kah raha hai sab ghalat us ko samajhte hain

haqiqat mein wahi hai be-haqiqat dastan shayad

jahan-e-dil to hai nazdik 'wasil' dur kyun jao

isi duniya mein rahta hai tumhaara mehrban shayad

ijazat bazyabi ki na de wo pasban shayad

na pahunche KHwab-gah-e-naz tak meri fughan shayad