jabr-e-shahi ka sirf baghawat ilaj hai

jabr-e-shahī kā sirf baġhāvat ilaaj hai

apnā azal se ek husainī mizāj hai

aage to zahr-e-ishq meñ sab zahr the ghule

ab shā.irī kī jaan rag-e-ehtijāj hai

aalī nazar ke sher pe tīkhe mubāhise

be-nūr ālimoñ kā maraz lā-ilāj hai

har aan haiñ dimāġh meñ afkār-e-shab-navāz

is ġham kī saltanat meñ bas ik dil sirāj hai

kyā dī hai lab-kushā.ī kī qīmat use bhī dekh

is daftar-e-navā meñ sabhī indirāj hai

is soñdhī miTTiyoñ ne diyā rañg o zā.iqa

hīroñ se baḌh ke aab meñ mulkī anaaj hai

'iqbāl' kī navā se musharraf hai go 'na.īm'

urdu ke sar pe 'mīr' kī ġhazloñ kā taaj hai

jabr-e-shahi ka sirf baghawat ilaj hai

apna azal se ek husaini mizaj hai

aage to zahr-e-ishq mein sab zahr the ghule

ab shairi ki jaan rag-e-ehtijaj hai

aali nazar ke sher pe tikhe mubahise

be-nur aalimon ka maraz la-ilaj hai

har aan hain dimagh mein afkar-e-shab-nawaz

is gham ki saltanat mein bas ek dil siraj hai

kya di hai lab-kushai ki qimat use bhi dekh

is daftar-e-nawa mein sabhi indiraj hai

is sondhi miTTiyon ne diya rang o zaiqa

hiron se baDh ke aab mein mulki anaj hai

'iqbaal' ki nawa se musharraf hai go 'naim'

urdu ke sar pe 'mir' ki ghazlon ka taj hai