jabr ne jab mujhe ruswa sar-e-bazar kiya

jabr ne jab mujhe rusvā sar-e-bāzār kiyā

sabr ne mere mujhe sāhab-e-dastār kiyā

merī lafzoñ kī imārat girī kaam aa.ī mire

merī ġhazloñ ne mire naam ko mīnār kiyā

apne hāthoñ meñ kudūrat kī kudāleñ le kar

mere apnoñ ne mirī zaat ko mismār kiyā

yaad jab aayā koī va.ada-e-ta.amīr mujhe

maiñ ne tab jism kī har por ko me.amār kiyā

aur phir sabz ishāra huā us paar se jab

maiñ ne ik jast meñ dariyā-e-balā paar kiyā

aaj phir ḳhaak bahut roī lipaT kar mujh se

aaj phir qabr ne baabā kī mujhe pyaar kiyā

chāñd ne raat mire saath mire dukh bāñTe

sub.h sūraj ne bhī girya sar-e-dīvār kiyā

aag ashjār ko lagne se ka.ī din pahle

maiñ ne ro ro ke parindoñ ko ḳhabar-dār kiyā

aisā mātam kabhī dariyā kā na dekhā na sunā

jaane kis pyaas ne paanī ko azā-dār kiyā

jab havā dene lagī ThanDe dilāse mujh ko

kuchh charāġhoñ ne bhī afsos kā iz.hār kiyā

dekh kar jaltī huī jhoñpaḌī kal shab 'vāsif'

maiñ ne so.e hue darvesh ko bedār kiyā

jabr ne jab mujhe ruswa sar-e-bazar kiya

sabr ne mere mujhe sahab-e-dastar kiya

meri lafzon ki imarat giri kaam aai mere

meri ghazlon ne mere nam ko minar kiya

apne hathon mein kudurat ki kudalen le kar

mere apnon ne meri zat ko mismar kiya

yaad jab aaya koi wada-e-tamir mujhe

main ne tab jism ki har por ko meamar kiya

aur phir sabz ishaara hua us par se jab

main ne ek jast mein dariya-e-bala par kiya

aaj phir KHak bahut roi lipaT kar mujh se

aaj phir qabr ne baba ki mujhe pyar kiya

chand ne raat mere sath mere dukh banTe

subh suraj ne bhi girya sar-e-diwar kiya

aag ashjar ko lagne se kai din pahle

main ne ro ro ke parindon ko KHabar-dar kiya

aisa matam kabhi dariya ka na dekha na suna

jaane kis pyas ne pani ko aza-dar kiya

jab hawa dene lagi ThanDe dilase mujh ko

kuchh charaghon ne bhi afsos ka izhaar kiya

dekh kar jalti hui jhonpaDi kal shab 'wasif'

main ne soe hue darwesh ko bedar kiya