kaam is duniya mein aa kar humne kya achchha kiya

kaam is duniyā meñ aa kar ham ne kyā achchhā kiyā

husn ko be-parda nām-e-ishq ko rusvā kiyā

husn ne aur ishq ne hañgāma ik barpā kiyā

sham.a ko raushan kiyā parvāne ko shaidā kiyā

be-tamannā.ī meñ āsūda thā yārab kyā kiyā

kis liye mere dil-e-dīvāna ko daanā kiyā

ek jazba thā azal se gosha-e-dil meñ nihāñ

ishq ko is husn ke bāzār ne rusvā kiyā

terī qismat kā navishta thā kisī kā kyā qusūr

tere aage aa gayā a dil jo thā terā kiyā

naar ne kī sar-kashī roz-e-azal jab iḳhtiyār

ḳhaak ko baḳhshā sharaf ya.anī bashar paidā kiyā

dil ko parvāna banāyā kar diyā jaañ ko nisār

sham.a-rū ke ishq meñ ham kyā kaheñ kyā kyā kiyā

jo kiyā hukm-e-qazā se ham ne 'sāhir' thā bajā

ham ne apnī raa.e se jo kuchh kiyā be-jā kiyā

kaam is duniya mein aa kar hum ne kya achchha kiya

husn ko be-parda nam-e-ishq ko ruswa kiya

husn ne aur ishq ne hangama ek barpa kiya

shama ko raushan kiya parwane ko shaida kiya

be-tamannai mein aasuda tha yarab kya kiya

kis liye mere dil-e-diwana ko dana kiya

ek jazba tha azal se gosha-e-dil mein nihan

ishq ko is husn ke bazar ne ruswa kiya

teri qismat ka nawishta tha kisi ka kya qusur

tere aage aa gaya a dil jo tha tera kiya

nar ne ki sar-kashi roz-e-azal jab iKHtiyar

KHak ko baKHsha sharaf yani bashar paida kiya

dil ko parwana banaya kar diya jaan ko nisar

shama-ru ke ishq mein hum kya kahen kya kya kiya

jo kiya hukm-e-qaza se hum ne 'sahir' tha baja

hum ne apni rae se jo kuchh kiya be-ja kiya