jaga raha hai tera gham nae nae jadu

jagā rahā hai tirā ġham na.e na.e jaadū

umañD rahī hai ġhazal se bahār kī ḳhushbū

chahak rahe haiñ tasavvur ke baaġh meñ panchhī

bhaTak rahe haiñ ḳhayāloñ ke dasht meñ aahū

lachak rahā hai fazāoñ meñ ḳhvāb kā resham

bikhar ga.e haiñ ufuq-tā-ufuq tire gesū

na jaane kaun sī manzil pe aa gayā huuñ maiñ

na jaane kaun sī bastī meñ rah ga.ī hai tū

mire gale meñ hamā.il haiñ naaz se ab tak

mujhe na chhoḌ sake terī yaad ke baazū

kidhar ho muhtasibo phir koī nayā mansūr

farāz-e-dār se chhalkā rahā hai jām-o-subū

kabhī to bām-e-surayyā ko chuum hī legā

bahut latīf hai aadam kī jumbish-e-abrū

jaga raha hai tera gham nae nae jadu

umanD rahi hai ghazal se bahaar ki KHushbu

chahak rahe hain tasawwur ke bagh mein panchhi

bhaTak rahe hain KHayalon ke dasht mein aahu

lachak raha hai fazaon mein KHwab ka resham

bikhar gae hain ufuq-ta-ufuq tere gesu

na jaane kaun si manzil pe aa gaya hun main

na jaane kaun si basti mein rah gai hai tu

mere gale mein hamail hain naz se ab tak

mujhe na chhoD sake teri yaad ke bazu

kidhar ho muhtasibo phir koi naya mansur

faraaz-e-dar se chhalka raha hai jam-o-subu

kabhi to baam-e-surayya ko chum hi lega

bahut latif hai aadam ki jumbish-e-abru