jahan-e-fikr-o-nazar ka sabaat le ke gaya

jahān-e-fikr-o-nazar kā sabāt le ke gayā

vo sirf dil hī nahīñ kā.enāt le ke gayā

vo ahd-e-rafta vo ulfat vo ehtirām-e-vafā

gayā to saath meñ saarī sifāt le ke gayā

bhaTak rahe the sarāb-e-nazar liye har-sū

shu.ūr-e-ishq jahāñ dil ko saath le ke gayā

maiñ sirf us ko taġhāful kahūñ to kaise kahūñ

gayā to saath meñ har iltifāt le ke gayā

ġhurūr le ke marā iḳhtiyār-e-hastī kā

tū apnī fikr-e-hayāt-o-mamāt le ke gayā

lahad vahī hai magar aa chuke na.e murde

to vaqt laash kī sab bāqiyāt le ke gayā

zamīr bechne vaale vo terā saudā-gar

zamīr hī nahīñ zaat o sifāt le ke gayā

vo aur kuchh bhī na rakhtā thā jism o jaañ ke sivā

sunā 'shahīd' matā-e-hayāt le ke gayā

jahan-e-fikr-o-nazar ka sabaat le ke gaya

wo sirf dil hi nahin kaenat le ke gaya

wo ahd-e-rafta wo ulfat wo ehtiram-e-wafa

gaya to sath mein sari sifat le ke gaya

bhaTak rahe the sarab-e-nazar liye har-su

shuur-e-ishq jahan dil ko sath le ke gaya

main sirf us ko taghaful kahun to kaise kahun

gaya to sath mein har iltifat le ke gaya

ghurur le ke mara iKHtiyar-e-hasti ka

tu apni fikr-e-hayat-o-mamat le ke gaya

lahad wahi hai magar aa chuke nae murde

to waqt lash ki sab baqiyat le ke gaya

zamir bechne wale wo tera sauda-gar

zamir hi nahin zat o sifat le ke gaya

wo aur kuchh bhi na rakhta tha jism o jaan ke siwa

suna 'shahid' mata-e-hayat le ke gaya