jahan-e-rang-o-bu ki dilkashi ban jaen hum donon

jahān-e-rang-o-bū kī dilkashī ban jaa.eñ ham donoñ

kisī ma.asūm bachche kī hañsī ban jaa.eñ ham donoñ

miTā deñ tīrgī ko raushnī ban jaa.eñ ham donoñ

sarāsar purnimā kī chāñdnī ban jaa.eñ ham donoñ

kahānī ḳhūbsūrat hai magar be-rang hai ab tak

chalo kirdār is ke markazī ban jaa.eñ ham donoñ

hamārā zikr bhī aa.e to aa.e ab misāloñ meñ

kareñ taqlīd jin kī sab vahī ban jaa.eñ ham donoñ

gavāhī ho hamārī har kisī mazlūm ke haq meñ

har ik bekas ke chehre kī ḳhushī ban jaa.eñ ham donoñ

badal deñ apne kirdār-o-amal se ham zamāne ko

ab aao pyaar kī pākīzgī ban jaa.eñ ham donoñ

zamīñ kī god bhar deñ ham mohabbat kī phuvāroñ se

sahāb-e-rahmat-o-āsūdgī ban jaa.eñ ham donoñ

qalam se apne 'sīmā' ham likheñ mas.hūr-kun ġhazleñ

diloñ ke saaz chheḌeñ naġhmagī ban jaa.eñ ham donoñ

jahan-e-rang-o-bu ki dilkashi ban jaen hum donon

kisi masum bachche ki hansi ban jaen hum donon

miTa den tirgi ko raushni ban jaen hum donon

sarasar purnima ki chandni ban jaen hum donon

kahani KHubsurat hai magar be-rang hai ab tak

chalo kirdar is ke markazi ban jaen hum donon

hamara zikr bhi aae to aae ab misalon mein

karen taqlid jin ki sab wahi ban jaen hum donon

gawahi ho hamari har kisi mazlum ke haq mein

har ek bekas ke chehre ki KHushi ban jaen hum donon

badal den apne kirdar-o-amal se hum zamane ko

ab aao pyar ki pakizgi ban jaen hum donon

zamin ki god bhar den hum mohabbat ki phuwaron se

sahab-e-rahmat-o-asudgi ban jaen hum donon

qalam se apne 'sima' hum likhen mashur-kun ghazlen

dilon ke saz chheDen naghmagi ban jaen hum donon