jahan-e-rang-o-bu mein thi ye virani magar kab tak

jahān-e-rañg-o-bū meñ thī ye vīrānī magar kab tak

hamāre pyaar kī ḳhushbū na pahuñchī thī yahāñ jab tak

tumhārī maslahat-koshī ko hai merā salām ai dil

unheñ chāhā unheñ puujā magar dekhā kahāñ ab tak

azal kī pyaas hoñToñ par liye phirtā rahā nādāñ

uThāyā jaam kitnoñ ne zi-bas pahuñchā kisī lab tak

chalo achchhā huā tum ne to saare daaġh dho Daale

mire dāman pe ye dhabbā rahegā zau-fishāñ kab tak

ḳhamoshī ne mirī kyā kah diyā tujh se ki ai daurāñ

thame aañsū na shabnam ke garebāñ-chāk gul kab tak

ġhalat hai tujh se ummīd-e-vafā ai fitna-e-daurāñ

yūñhī baaqī haiñ hangāme rahe tū mehrbāñ jab tak

'anīs' is kaifiyat meñ ye ġhazal likhnā qayāmat hai

lagegī aag jab dil meñ to pahuñchegā dhuāñ lab tak

jahan-e-rang-o-bu mein thi ye virani magar kab tak

hamare pyar ki KHushbu na pahunchi thi yahan jab tak

tumhaari maslahat-koshi ko hai mera salam ai dil

unhen chaha unhen puja magar dekha kahan ab tak

azal ki pyas honTon par liye phirta raha nadan

uThaya jam kitnon ne zi-bas pahuncha kisi lab tak

chalo achchha hua tum ne to sare dagh dho Dale

mere daman pe ye dhabba rahega zau-fishan kab tak

KHamoshi ne meri kya kah diya tujh se ki ai dauran

thame aansu na shabnam ke gareban-chaak gul kab tak

ghalat hai tujh se ummid-e-wafa ai fitna-e-dauran

yunhi baqi hain hangame rahe tu mehrban jab tak

'anis' is kaifiyat mein ye ghazal likhna qayamat hai

lagegi aag jab dil mein to pahunchega dhuan lab tak