jahan KHud-gharziyan hon wo nagar achchha nahin lagta

jahāñ ḳhud-ġharziyāñ hoñ vo nagar achchhā nahīñ lagtā

ki jis meñ bhaa.ī laḌte huuñ vo ghar achchhā nahīñ lagtā

vo dastār-e-anā pahne qabīle kā sitāra hai

amīr-e-shahr ko lekin vo sar achchhā nahīñ lagtā

jo vālid kā buḌhāpe meñ sahārā ban nahīñ saktā

jo sach pūchho to ho laḳht-e-jigar achchhā nahīñ lagtā

mujhe to pyaar hai un se jo kaam aate haiñ auroñ ke

faqat daulat kamāne kā hunar achchhā nahīñ lagtā

chaman ko rauñdne vaale ko rahbar kis tarah mānūñ

vo ḳhud achchhā bane mujh ko magar achchhā nahīñ lagtā

mujhe to pyaar vaalī apnī kuTiyā achchhī lagtī hai

jo aivāñ nafrateñ de us kā dar achchhā nahīñ lagtā

jo bachche bhuul kar rañgīniyoñ meñ ġharq ho jaa.e

ḳhudā shāhid hai mujh ko vo pidar achchhā nahīñ lagtā

hadaf ho sāmne 'anvār' to chalte hī rahte haiñ

sarāboñ kā ham ko safar achchhā nahīñ lagtā

jahan KHud-gharziyan hon wo nagar achchha nahin lagta

ki jis mein bhai laDte hun wo ghar achchha nahin lagta

wo dastar-e-ana pahne qabile ka sitara hai

amir-e-shahr ko lekin wo sar achchha nahin lagta

jo walid ka buDhape mein sahaara ban nahin sakta

jo sach puchho to ho laKHt-e-jigar achchha nahin lagta

mujhe to pyar hai un se jo kaam aate hain auron ke

faqat daulat kamane ka hunar achchha nahin lagta

chaman ko raundne wale ko rahbar kis tarah manun

wo KHud achchha bane mujh ko magar achchha nahin lagta

mujhe to pyar wali apni kuTiya achchhi lagti hai

jo aiwan nafraten de us ka dar achchha nahin lagta

jo bachche bhul kar ranginiyon mein gharq ho jae

KHuda shahid hai mujh ko wo pidar achchha nahin lagta

hadaf ho samne 'anwar' to chalte hi rahte hain

sarabon ka hum ko safar achchha nahin lagta