jahan ki qaid se wabasta thi najat meri

jahāñ kī qaid se vābasta thī najāt mirī

mirī hayāt meñ zinda rahī vafāt mirī

jo tujh se bichhḌā to miT jā.egā vajūd mirā

tire vajūd meñ bastī hai kā.enāt mirī

qalam bhī toḌ do kāġhaz bhī phaaḌ do merā

raqam havā pe ho jā.eñgī ġhazliyāt mirī

laboñ pe bāñdh ke shohrat liyā hai bosa kyā

har ik zabāñ pe uchhalne lagī hai baat mirī

ajal bhī aatī nahīñ merī dast-gīrī ko

so roz jaañ mirī letī hai ab hayāt mirī

havas kī aag ke dariyā se mujh ko bachnā hai

bhale hī pyaas se mar jaa.eñ ḳhvāhishāt mirī

sabhī sahūlateñ miltī haiñ bas suhūlat se

pe kaam aatī haiñ mushkil meñ mushkilāt mirī

jahan ki qaid se wabasta thi najat meri

meri hayat mein zinda rahi wafat meri

jo tujh se bichhDa to miT jaega wajud mera

tere wajud mein basti hai kaenat meri

qalam bhi toD do kaghaz bhi phaD do mera

raqam hawa pe ho jaengi ghazliyat meri

labon pe bandh ke shohrat liya hai bosa kya

har ek zaban pe uchhalne lagi hai baat meri

ajal bhi aati nahin meri dast-giri ko

so roz jaan meri leti hai ab hayat meri

hawas ki aag ke dariya se mujh ko bachna hai

bhale hi pyas se mar jaen KHwahishat meri

sabhi sahulaten milti hain bas suhulat se

pe kaam aati hain mushkil mein mushkilat meri