jahan mein jis ki shohrat ku-ba-ku hai

jahāñ meñ jis kī shohrat kū-ba-kū hai

vo mujh se aaj mahv-e-guftugū hai

rahā ābād ḳhvāboñ meñ jo ab tak

ḳhushā qismat ki ab vo rū-ba-rū hai

kabhī vo pyaar se ik phuul laa.e

bahut din se mirī ye aarzū hai

nahīñ aatā ġhazal meñ naam koī

ta.alluq is qadar bā-ābrū hai

mirā ehsās jis se hai mo.attar

vahī ḳhushbū to mere chār-sū hai

sarāpā merā jo hai itnā rañgīñ

ye us kī yaad kā hī rañg-o-bū hai

jahāñ kal tak thā māyūsī kā sahrā

vahāñ ummīd kī ik aabjū hai

vo āvāzeñ jo dil meñ gūñjtī haiñ

mirī anfās kī vo hāv-hū hai

mujhe le jaa.e jo manzil kī jānib

ab aise kārvāñ kī justujū hai

mirā zāhir nazar aatā hai jaisā

mirā bātin bhī vaisā hū-ba-hū hai

'sabīla' soch itnī paak rakkhī

har ik mazmūn merā bā-vazū hai

jahan mein jis ki shohrat ku-ba-ku hai

wo mujh se aaj mahw-e-guftugu hai

raha aabaad KHwabon mein jo ab tak

KHusha qismat ki ab wo ru-ba-ru hai

kabhi wo pyar se ek phul lae

bahut din se meri ye aarzu hai

nahin aata ghazal mein nam koi

talluq is qadar ba-abru hai

mera ehsas jis se hai moattar

wahi KHushbu to mere chaar-su hai

sarapa mera jo hai itna rangin

ye us ki yaad ka hi rang-o-bu hai

jahan kal tak tha mayusi ka sahra

wahan ummid ki ek aabju hai

wo aawazen jo dil mein gunjti hain

meri anfas ki wo haw-hu hai

mujhe le jae jo manzil ki jaanib

ab aise karwan ki justuju hai

mera zahir nazar aata hai jaisa

mera baatin bhi waisa hu-ba-hu hai

'sabila' soch itni pak rakkhi

har ek mazmun mera ba-wazu hai