jahan sansen nahin chaltin wahan kya chal raha hai

jahāñ sāñseñ nahīñ chaltīñ vahāñ kyā chal rahā hai

bahisht-e-ḳhāk meñ ai raftagāñ kyā chal rahā hai

purāne dukh na.e kapḌe pahan kar aa ga.e haiñ

ye apne shahr meñ āzurdagāñ kyā chal rahā hai

ye jin ke ashk merī jaan ko aa.e hue haiñ

maiñ un se pūchh baiThā thā miyāñ kyā chal rahā hai

hamārā bhuuk ne muñh bhar diyā hai gāliyoñ se

tumhāre bad-nasīboñ ke yahāñ kyā chal rahā hai

haiñ ashkoñ ke nishāne par musalsal dukh hamāre

ye chāleñ ham se andoh-e-jahāñ kyā chal rahā hai

nadāmat se maiñ apnā muñh chhupātā phir rahā huuñ

ye mere dostoñ ke darmiyāñ kyā chal rahā hai

yahāñ har roz hoñToñ ke gine jaate haiñ Tāñke

tumhāre shahr meñ sho.ala-bayāñ kyā chal rahā hai

chalā kar goliyāñ mujh par parindoñ ko batāo

jahāñ piñjre nahīñ bante vahāñ kyā chal rahā hai

to phir qaabū kiyā hai hijr kis jaadū se tum ne

udāsī gar nahīñ afsurda-gāñ kyā chal rahā hai

hamāre rahbaroñ ko jaan ke laale paḌe haiñ

tumhāre rahbaroñ meñ gumrahāñ kyā chal rahā hai

jahan sansen nahin chaltin wahan kya chal raha hai

bahisht-e-KHak mein ai raftagan kya chal raha hai

purane dukh nae kapDe pahan kar aa gae hain

ye apne shahr mein aazurdagan kya chal raha hai

ye jin ke ashk meri jaan ko aae hue hain

main un se puchh baiTha tha miyan kya chal raha hai

hamara bhuk ne munh bhar diya hai galiyon se

tumhaare bad-nasibon ke yahan kya chal raha hai

hain ashkon ke nishane par musalsal dukh hamare

ye chaalen hum se andoh-e-jahan kya chal raha hai

nadamat se main apna munh chhupata phir raha hun

ye mere doston ke darmiyan kya chal raha hai

yahan har roz honTon ke gine jate hain Tanke

tumhaare shahr mein shoala-bayan kya chal raha hai

chala kar goliyan mujh par parindon ko batao

jahan pinjre nahin bante wahan kya chal raha hai

to phir qabu kiya hai hijr kis jadu se tum ne

udasi gar nahin afsurda-gan kya chal raha hai

hamare rahbaron ko jaan ke lale paDe hain

tumhaare rahbaron mein gumrahan kya chal raha hai