jahan sinon mein dil shanon pe sar aabaad hote hain

jahāñ sīnoñ meñ dil shānoñ pe sar ābād hote haiñ

vahī do-chār to bastī meñ ghar ābād hote haiñ

bahut sābit-qadam nikleñ ga.e vaqtoñ kī tahzībeñ

ki ab un ke havāloñ se khañDar ābād hote haiñ

buzurgoñ ko tabarruk kī tarah rakkho makānoñ meñ

balā.eñ rad kiye jaane se ghar ābād hote haiñ

zabāñ-bandī ke mausam meñ galī-kūchoñ kī mat pūchho

parindoñ ke chahakne se shajar ābād hote haiñ

jo patthar kī siloñ ko tāj-mahaloñ meñ badal Dāleñ

yahāñ kachche gharoñ meñ vo hunar ābād hote haiñ

mire andoh meñ muzmar hai us kī sarḳhushī aise

Dubo kar kashtiyāñ jaise bhañvar ābād hote haiñ

mirī ta.amīr behtar shakl meñ hone ko hai 'anjum'

ki jañgal saaf hone se nagar ābād hote haiñ

jahan sinon mein dil shanon pe sar aabaad hote hain

wahi do-chaar to basti mein ghar aabaad hote hain

bahut sabit-qadam niklen gae waqton ki tahziben

ki ab un ke hawalon se khanDar aabaad hote hain

buzurgon ko tabarruk ki tarah rakkho makanon mein

balaen rad kiye jaane se ghar aabaad hote hain

zaban-bandi ke mausam mein gali-kuchon ki mat puchho

parindon ke chahakne se shajar aabaad hote hain

jo patthar ki silon ko taj-mahalon mein badal Dalen

yahan kachche gharon mein wo hunar aabaad hote hain

mere andoh mein muzmar hai us ki sarKHushi aise

Dubo kar kashtiyan jaise bhanwar aabaad hote hain

meri tamir behtar shakl mein hone ko hai 'anjum'

ki jangal saf hone se nagar aabaad hote hain