jaisi hai badan mein gul-ruKH ke waisi hi nazakat baaton mein

jaisī hai badan meñ gul-ruḳh ke vaisī hī nazākat bātoñ meñ

hoñToñ meñ hai jitnī shīrīnī utnī hī halāvat bātoñ meñ

kyā ḳhuub tavāzun chalne meñ kyā ḳhuub latāfat hañsne meñ

kyā ḳhuub adāoñ meñ shoḳhī kyā ḳhuub sharārat bātoñ meñ

āñkhoñ meñ hai nashsha sā chhāyā ruḳhsār hue surḳhī maa.il

hoñToñ pe larazte haiñ armāñ pur-kaif harārat bātoñ meñ

zīnat kā tarīqa kyā kahne fashion kā salīqa kyā kahne

ādāb kī rañgat kāmoñ meñ ash.ār kī nik.hat bātoñ meñ

betāb haiñ jis ko sunñe ko vo baat na lā.eñge lab par

mas.hūr vo rakkheñge phir bhī aisī hai nafāsat bātoñ meñ

parvāz meñ hastī kī ham ko kitnī hī bulandī ho hāsil

aa.e na mizājoñ meñ sheḳhī aa.e na ra.ūnat bātoñ meñ

hal saare masā.il ho jaa.eñ aapas kī kudūrat miT jaa.e

ho jhuuT se sab ko be-zārī ho rañg-e-sadāqat bātoñ meñ

is daur ke shā.er meñ logo tahzīb o shu.ūr o soz kahāñ

me.aar vahī hai sheroñ kā jaisī hai jihālat bātoñ meñ

'jāved' ajab ahbāb tire karte haiñ ye zaa.e.a vaqt tirā

haiñ ilm se kosoñ duur magar phir bhī hai tavālat bātoñ meñ

jaisi hai badan mein gul-ruKH ke waisi hi nazakat baaton mein

honTon mein hai jitni shirini utni hi halawat baaton mein

kya KHub tawazun chalne mein kya KHub latafat hansne mein

kya KHub adaon mein shoKHi kya KHub shararat baaton mein

aankhon mein hai nashsha sa chhaya ruKHsar hue surKHi mail

honTon pe larazte hain arman pur-kaif hararat baaton mein

zinat ka tariqa kya kahne fashion ka saliqa kya kahne

aadab ki rangat kaamon mein ashaar ki nikhat baaton mein

betab hain jis ko sunne ko wo baat na laenge lab par

mashur wo rakkhenge phir bhi aisi hai nafasat baaton mein

parwaz mein hasti ki hum ko kitni hi bulandi ho hasil

aae na mizajon mein sheKHi aae na raunat baaton mein

hal sare masail ho jaen aapas ki kudurat miT jae

ho jhuT se sab ko be-zari ho rang-e-sadaqat baaton mein

is daur ke shaer mein logo tahzib o shuur o soz kahan

mear wahi hai sheron ka jaisi hai jihaalat baaton mein

'jawed' ajab ahbab tere karte hain ye zaea waqt tera

hain ilm se koson dur magar phir bhi hai tawalat baaton mein