jal bujha hun main magar sara jahan tak mein hai

jal bujhā huuñ maiñ magar saarā jahāñ taak meñ hai

koī tāsīr to maujūd mirī ḳhaak meñ hai

kheñchtī rahtī hai har lamha mujhe apnī taraf

jaane kyā chiiz hai jo parda-e-aflāk meñ hai

koī sūrat bhī nahīñ miltī kisī sūrat meñ

kūza-gar kaisā karishma tire is chaak meñ hai

kaise Thahrūñ ki kisī shahr se miltā hī nahīñ

ek naqsha jo mire dīda-e-namnāk meñ hai

ye ilāqa bhī magar dil hī ke taabe Thahrā

ham samajhte the amaañ gosha-e-idrāk meñ hai

qatl hote haiñ yahāñ nāra-e-elān ke saath

vaz.a-dārī to abhī ālam-e-saffāk meñ hai

kitnī chīzoñ ke bhalā naam tujhe ginvā.ūñ

saarī duniyā hī to shāmil mirī imlāk meñ hai

rā.egāñ koī bhī shai hotī nahīñ hai 'ālam'

ġhaur se dekhiye kyā kyā ḳhas-o-ḳhāshāk meñ hai

jal bujha hun main magar sara jahan tak mein hai

koi tasir to maujud meri KHak mein hai

khenchti rahti hai har lamha mujhe apni taraf

jaane kya chiz hai jo parda-e-aflak mein hai

koi surat bhi nahin milti kisi surat mein

kuza-gar kaisa karishma tere is chaak mein hai

kaise Thahrun ki kisi shahr se milta hi nahin

ek naqsha jo mere dida-e-namnak mein hai

ye ilaqa bhi magar dil hi ke tabe Thahra

hum samajhte the aman gosha-e-idrak mein hai

qatl hote hain yahan nara-e-elan ke sath

waza-dari to abhi aalam-e-saffak mein hai

kitni chizon ke bhala nam tujhe ginwaun

sari duniya hi to shamil meri imlak mein hai

raegan koi bhi shai hoti nahin hai 'alam'

ghaur se dekhiye kya kya KHas-o-KHashak mein hai