جلا کے اپنے بدن کو دھواں ہوا تھا میں

جلا کے اپنے بدن کو دھواں ہوا تھا میں

بکھر بکھر کے زمان و مکاں ہوا تھا میں

تمہارے شہر کے سورج سے کون ڈرتا ہے

غموں کی دھوپ میں جل کر جواں ہوا تھا میں

سمندروں نے مجھے کتنے بھید سمجھائے

زمیں پہ پھیل کے جب بے کراں ہوا تھا میں

ورق ورق نے مرے ہاتھ میں قلم سونپا

غزل کے شہر میں جب بے زباں ہوا تھا میں

حصار درد سے نکلا تو یوں ہوا تقسیم

کہیں زمین کہیں آسماں ہوا تھا میں

نئی صدی کے اجالے سمیٹ کر اے صباؔ

نئے افق کی طرف ہی رواں ہوا تھا میں