jald husn-o-jamal jata hai

jald husn-o-jamāl jaatā hai

nahīñ rahtā ye haal jaatā hai

jab talak dekhtā nahīñ us ko

dil meñ kyā kyā ḳhayāl jaatā hai

kaun se vaqt 'arz-e-hāl karūñ

vo to har vaqt Taal jaatā hai

jis kā hotā hai ġham se dil bhārī

vo tire dar pe Daal jaatā hai

sarsoñ āñkhoñ meñ kyuuñ na phūle ab

zard oḌhe do-shāl jaatā hai

saaf samjhā nahīñ mujhe 'āshiq

baat kahte sañbhāl jaatā hai

jaan detā huuñ jald dekhūñ to

nāma-bar kaisī chaal jaatā hai

nukta-chīnoñ ne kuchh kahā to kyā

koī is meñ kamāl jaatā hai

kuchh rihā.ī nazar nahīñ aatī

yuuñ hī ab kā bhī saal jaatā hai

aah misl-e-shab-e-javānī jald

kyā ye roz-e-visāl jaatā hai

dilbarī vo sanam kare merī

kuchh bhalā ehtimāl jaatā hai

yuuñ ḳhudā kī ḳhudā.ī hai mā'mūr

par kab apnā ḳhayāl jaatā hai

tū to ḳhush ho 'hasan' ke jaane se

terā ranj-o-malāl jaatā hai

jald husn-o-jamal jata hai

nahin rahta ye haal jata hai

jab talak dekhta nahin us ko

dil mein kya kya KHayal jata hai

kaun se waqt 'arz-e-haal karun

wo to har waqt Tal jata hai

jis ka hota hai gham se dil bhaari

wo tere dar pe Dal jata hai

sarson aankhon mein kyun na phule ab

zard oDhe do-shaal jata hai

saf samjha nahin mujhe 'ashiq

baat kahte sanbhaal jata hai

jaan deta hun jald dekhun to

nama-bar kaisi chaal jata hai

nukta-chinon ne kuchh kaha to kya

koi is mein kamal jata hai

kuchh rihai nazar nahin aati

yun hi ab ka bhi sal jata hai

aah misl-e-shab-e-jawani jald

kya ye roz-e-visal jata hai

dilbari wo sanam kare meri

kuchh bhala ehtimal jata hai

yun KHuda ki KHudai hai ma'mur

par kab apna KHayal jata hai

tu to KHush ho 'hasan' ke jaane se

tera ranj-o-malal jata hai