jalega chand sitare dhuan uDaenge

jalegā chāñd sitāre dhuāñ uḌā.eñge

hamāre ḳhvāb tirī aañkh meñ jab ā.eñge

mirī nazar se vo chehre utar nahīñ sakte

jinheñ ye ahl-e-nazar jald bhuul jā.eñge

ġhazal sunāo bahalnā bahut zarūrī hai

hañseñge log ham aañsū agar bahā.enge

phir aa.ī shaam daraḳhtoñ pe ghoñsle jaage

magar ham aaj bhī ai dost ghar na jā.eñge

udaas rahiye na uktā ke ḳhud-kushī kiije

vo din qarīb hai jab aap gul khilā.enge

kafan se kam nahīñ jaaḌe kī chāñdnī 'rāhī'

ab is ko oḌh ke ham kaise muskurā.eñge

jalega chand sitare dhuan uDaenge

hamare KHwab teri aankh mein jab aaenge

meri nazar se wo chehre utar nahin sakte

jinhen ye ahl-e-nazar jald bhul jaenge

ghazal sunao bahalna bahut zaruri hai

hansenge log hum aansu agar bahaenge

phir aai sham daraKHton pe ghonsle jage

magar hum aaj bhi ai dost ghar na jaenge

udas rahiye na ukta ke KHud-kushi kije

wo din qarib hai jab aap gul khilaenge

kafan se kam nahin jaDe ki chandni 'rahi'

ab is ko oDh ke hum kaise muskuraenge