jalta hun hijr-e-shahid o yaad-e-sharab mein

jaltā huuñ hijr-e-shāhid o yād-e-sharāb meñ

shauq-e-savāb ne mujhe Daalā azaab meñ

kahte haiñ tum ko hosh nahīñ iztirāb meñ

saare gile tamām hue ik javāb meñ

phailī shamīm-e-yār mire ashk-e-surḳh se

dil ko ġhazab fishār huā pech-o-tāb meñ

chīn-e-jabīñ ko dekh ke dil basta-tar huā

kaisī kushūd-e-kār kushād-e-naqāb meñ

ham kuchh to bad the jab na kiyā yaar ne pasand

ai hasrat is qadar ġhalatī intiḳhāb meñ

rahte haiñ jamā kūcha-e-jānāñ meñ ḳhaas o aam

ābād ek ghar hai jahān-e-ḳharāb meñ

aañkh us kī phir ga.ī thī dil apnā bhī phir gayā

ye aur inqilāb huā inqilāb meñ

badnām mere girya-e-rusvā se ho chuke

ab uzr kyā rahā nigah-e-be-hijāb meñ

matlab kī justujū ne ye kyā haal kar diyā

hasrat bhī ab nahīñ dil-e-nākām-yāb meñ

goyā ki ro rahā huuñ raqīboñ kī jaan ko

ātish zabāna-zan huī tūfān-e-āb meñ

nākāmiyoñ se kaam rahā umr bhar hameñ

piirī meñ yaas hai jo havas thī shabāb meñ

hai iḳhtiyār-e-yār meñ suud o ziyāñ magar

fāzil the ham jahāñ se qazā ke hisāb meñ

nāseh hai aib-jū o dil-āzār is qadar

goyā savāb hai suḳhan-e-nā-savāb meñ

donoñ kā ek haal hai ye mudda.ā ho kaash

vo hī ḳhat us ne bhej diyā kyuuñ javāb meñ

taqdīr bhī burī mirī taqrīr bhī burī

bigḌe vo pursish-e-sabab-e-ijtināb meñ

kyā jalve yaad aa.e ki apnī ḳhabar nahīñ

be-bāda mast huuñ maiñ shab-e-māhtāb meñ

hai minnatoñ kā vaqt shikāyat rahī rahī

aa.e to haiñ manāne ko vo par itaab meñ

terī jafā na ho to hai sab dushmanoñ se amn

badmast ġhair mahv dil aur baḳht ḳhvāb meñ

paiham sujūd pā-e-sanam par dam-e-vidā

'momin' ḳhudā ko bhuul ga.e iztirāb meñ

jalta hun hijr-e-shahid o yaad-e-sharab mein

shauq-e-sawab ne mujhe Dala azab mein

kahte hain tum ko hosh nahin iztirab mein

sare gile tamam hue ek jawab mein

phaili shamim-e-yar mere ashk-e-surKH se

dil ko ghazab fishaar hua pech-o-tab mein

chin-e-jabin ko dekh ke dil basta-tar hua

kaisi kushud-e-kar kushad-e-naqab mein

hum kuchh to bad the jab na kiya yar ne pasand

ai hasrat is qadar ghalati intiKHab mein

rahte hain jama kucha-e-jaanan mein KHas o aam

aabaad ek ghar hai jahan-e-KHarab mein

aankh us ki phir gai thi dil apna bhi phir gaya

ye aur inqilab hua inqilab mein

badnam mere girya-e-ruswa se ho chuke

ab uzr kya raha nigah-e-be-hijab mein

matlab ki justuju ne ye kya haal kar diya

hasrat bhi ab nahin dil-e-nakaam-yab mein

goya ki ro raha hun raqibon ki jaan ko

aatish zabana-zan hui tufan-e-ab mein

nakaamiyon se kaam raha umr bhar hamein

piri mein yas hai jo hawas thi shabab mein

hai iKHtiyar-e-yar mein sud o ziyan magar

fazil the hum jahan se qaza ke hisab mein

naseh hai aib-ju o dil-azar is qadar

goya sawab hai suKHan-e-na-sawab mein

donon ka ek haal hai ye muddaa ho kash

wo hi KHat us ne bhej diya kyun jawab mein

taqdir bhi buri meri taqrir bhi buri

bigDe wo pursish-e-sabab-e-ijtinab mein

kya jalwe yaad aae ki apni KHabar nahin

be-baada mast hun main shab-e-mahtab mein

hai minnaton ka waqt shikayat rahi rahi

aae to hain manane ko wo par itab mein

teri jafa na ho to hai sab dushmanon se amn

badmast ghair mahw dil aur baKHt KHwab mein

paiham sujud pa-e-sanam par dam-e-wida

'momin' KHuda ko bhul gae iztirab mein