jalte rahna kaam hai dil ka bujh jaane se hasil kya

jalte rahnā kaam hai dil kā bujh jaane se hāsil kyā

apnī aag ke īñdhan haiñ ham īñdhan kā mustaqbil kyā

bolo nuqūsh-e-pā kuchh bolo tum to shāyad sunte ho

bhaag rahī hai rāhguzar ke kaan meñ kah kar manzil kyā

Dūbne vālo! dekh rahe ho tum to kashtī ke taḳhte

dekho dekho ġhaur se dekho dauḌ rahā hai sāhil kyā

an-paḌh āñdhī ghus paḌtī hai toḌ ke phāTak mahloñ ke

''andar aanā man.a hai'' likh kar laTkāne se hāsil kyā

qatl-e-vaqār-e-ishq kā mujrim jahl-e-havas-kārāñ hī nahīñ

nañge is hammām meñ sab haiñ aalim kyā aur jāhil kyā

parvāne ab apnī apnī aag meñ jalte rahte haiñ

sho.aloñ ke baTvāre se thā maqsad-e-sham-e-mahfil kyā

TuuTī dhanak ke TukḌe le kar bādal rote phirte haiñ

khīñchā-tānī meñ rañgoñ kī sūraj bhī hai shāmil kyā

jalte rahna kaam hai dil ka bujh jaane se hasil kya

apni aag ke indhan hain hum indhan ka mustaqbil kya

bolo nuqush-e-pa kuchh bolo tum to shayad sunte ho

bhag rahi hai rahguzar ke kan mein kah kar manzil kya

Dubne walo! dekh rahe ho tum to kashti ke taKHte

dekho dekho ghaur se dekho dauD raha hai sahil kya

an-paDh aandhi ghus paDti hai toD ke phaTak mahlon ke

andar aana mana hai likh kar laTkane se hasil kya

qatl-e-waqar-e-ishq ka mujrim jahl-e-hawas-karan hi nahin

nange is hammam mein sab hain aalim kya aur jahil kya

parwane ab apni apni aag mein jalte rahte hain

shoalon ke baTware se tha maqsad-e-sham-e-mahfil kya

TuTi dhanak ke TukDe le kar baadal rote phirte hain

khincha-tani mein rangon ki suraj bhi hai shamil kya